KIONGOZI WA BREXIT NIGEL FARAGE AHUTUBIA KATIKA MKUTANO WA DONALD TRUMP.

Donald Trump na Nigel Farage.

Mwanasiasa mmoja wa Uingereza aliyeongoza kampeni ya kujiondoa kutoka ndani ya Umoja wa Ulaya (EU) Nigel Farage, amehutubia katika mkutano mmoja wa kampeni za uraisi za chama cha Republican nchini Marekani.

Huku mgombea wa urais chama cha Republican, Donald Trump akisimama naye, kinara huyo anayeondoka katika chama cha UK Independence Party (UKIP) amewaambia wafuasi wa Republican kuwa mambo mengi yanawezekana watu wema wakisimama kidete kupinga uongozi wowote ule.

Mkutano huo ulifanyika Jackson, Mississippi umehudhuriwa na jumla ya wanaharakati 15,000 wa chama cha Republican.

Wakati wa kampeni ya kutetea kujiondoa kwa Uingereza kutoka UE, Trump alitangaza uungaji mkono wake.

Farage alipokuwa akihutubia alisema kampeni inayoendeshwa kwa sasa na chama cha Republican inatoa fursa nzuri sana.

"Mnaweza kuwashinda watu wanaofanya kura za maoni, mnaweza kuwashinda wachanganuzi wa masuala ya kisiasa na kiuchumi, mnaweza kuwashinda watu wanaodhibiti Washington" Alisema Farage.

Kiongozi huyo wa UKIP pia alihudhuria mkutano mkuu wa kuidhinisha mgombea urais wa Republican jijini Cleveland, mwezi uliopita.

Lakini alisema pia angekuwa Mmarekeni asingethubutu kumpigia kura mpinzani mkuu wa Trump, mwanamama Hillary Clinton wa chama cha Democratic hata akilipwa.

Trump alihutubia katika mkutano huo akimsifu Farage na kusema aliwezesha Uingereza kuchukua tena udhibiti wa mipaka yake wakati wa kura ya kujiondoa kutoka UE.