MTOTO ALIYEPOTEA MWAKA JANA APATIKANA BAADA YA KUONEKANA KWENYE VIDEO YA KALA JEREMIAH.

MTOTO AKIWA NA MAMA YAKE.

Mwanamziki wa hiphop Kala Jeremiah leo amepost kwenye akaunti yake ya instagram akielezea jinsi video yake ya WANANDOTO ilivyowakutanisha mama na mtoto ambao walipotezana mwaka jana. Aliandika maneno yafuatayo;

''Siku tatu zilizopita nilipigiwa simu na mtu akaniambia Kuna mama kamuona mtoto wake kwenye video yangu ya wanandoto na mtoto huyo alipotea tokea mwaka Jana mwezi wa 9 mama wa mtoto alifanya jitihada zote za kumpata mtoto wake Bila mafanikio lakini juzi juzi akiwa anatazama video ya WANANDOTO akamuona mwanae kwenye video hiyo Hali iliyompelekea kupata mshangao na mshituko ndipo alipoamua kumtafuta mtangazaji flani wa redio flani ndipo mtangazaji huyo akanitafuta na kuniunganisha na mama huyo. Mama yule alinieleza kwa masikitiko makubwa Sana kuwa mtoto wake alipotea toka mwaka Jana mwezi wa 9 alimtafuta Sana kila sehemu alienda kwa waganga wengi alienda kwenye maombi ya kila aina lakini hakufanikiwa kumpata mwanae mwaka alipokuja kumuona kwenye video ya wanandoto. Baada ya mama huyo kunieleza yote hayo nikawasiliana na kituo cha kulelea watoto cha CHAKUWAMA ambapo mtoto ADAM analelewa nikawaeleza Habari hii wakakili kweli Adam yupo na ni kweli walimpata mwaka Jana mwezi wa 9. basi nikawasiliana Tena na mamayake Adam na kumwambia kuwa nimewasiliana na mlezi wa kituo amekiri kuwepo kwa Adam kituoni hapo na kwakuwa mimi sipo dar kwa Muda huu nikamuunganisha mama Adam na mlezi wa kituo kile wakawasiliana na Jana mama Adam amefika kituoni pale na kuonana na mwanae na amefurahi Sana''.

SITTA KUZIKWA JUMAMOSI.

Mwili wa aliyekuwa Spika wa Bunge la 9, Samweli Sitta kuwasili nchini siku ya Alhamisi na mazishi ya marehemu kufanyika Jumamosi Urambo, mkoani Tabora.

Siku ya Ijumaa saa 3 asubuhi mwili wa marehemu utaagwa katika ukumbi wa Karimjee jijini Dar katika ibada itakayoongozwa na Askofu Mkuu wa Kanisa la Kiinjili la Kilutheri Tanzania (KKKT), Dk Alex Malasusa.

Baada ya ibada hiyo, saa 6 kamili mwili wa marehemu utasafirishwa kwenda Dodoma kwa ndege na saa 8 Wabunge wa Bunge la Jamhuri ya Muungano wa Tanzania na viongozi wengine watauaga kabla ya kusafirishwa kwenda Tabora saa kumi jioni.

KENYA:WEZI WAIBA MTAMBO WA ATM WA EQUITY BANK.

Polisi nchini Kenya katika jiji kuu Nairobi wamemkamata mlinzi wa Benki ya Equity kuhusiana na wizi mwishoni mwa wiki ambapo wezi walitoweka na mtambo wa kutoa pesa, ATM.

Wezi hao walitoweka na kiasi cha pesa ambacho hakijajulikana kwa sasa wakati wa wizi huo Jumamosi.

Wezi hao walichimba ukuta wa nyuma wa Benki hiyo na kutoweka na sanduku la uhifadhi wa pesa pamoja na mtambo wa ATM, pesa zikiwa ndani.

Washukiwa waliweza kuzima kamera za CCTV na pia kengele ya usalama kabla ya kutekeleza wizi huo.

Akizungumza na BBC, kamanda wa jimbo la Nairobi Japheth Koome amesema kwamba polisi waliweza kupata mitungi ya gesi na vifaa vingine ambavyo hutumuka kukata chuma.

Alipoulizwa kama wezi siku hizi wamepata umaarifa utadhani wanaiga filamu, alisema kwamba kwa siku za hivi karibuni wizi wa benki unazidi kubadilika sana.

Mwaka uliopita, wezi waliojifanya wakaguzi wa hesabu katika benki hiyo walitoweka na dola za Marekani 300,000.

DIAMOND ANG'ARA NA TUZO 3 ZA AFRIMMA

Msanii Diamond Platinumz ndiye mshindi wa tuzo ya msanii bora wa tuzo za Afrimawards upande wa wanaume katika eneo la Afrika Mashariki.

Diamond alijipatia tuzo tatu katika tamasha hiyo iliofanyika mjini Lagos nchini Nigeria huku nyota wa Afrika waliohudhuria wakiwaenzi Manu Dibango, King Sunny Ade na marehemu Papa Wemba.

Msanii wa Uganda Cindy Sanyu naye alijishindia tuzo la mwanamuziki bora wa kike Afrika Mashariki huku Mwanamuziki Wizkid wa Nigeria akijishindia tuzo la msanii bora wa mwaka Afrika.

Tuzo ya Kolabo bora zaidi iliwaendea Eddy Kenzo na Niniola kutoka Nigeria.

 Facebook Diamond aliandika hivi:

''Ningependa niwashukuru na niwajuze kuwa kipenzi chenu jana nimeshinda tuzo tatu...nyimbo bora ya Afrika- #Utanipenda ,msanii bora wa muziki wa Afro Pop na Msanii bora wa Afrika mashariki''.

Ifuatayo ni orodha ya wasanii walioshinda tuzo za Afrimma:

1. Msanii bora wa kiume Afrika mashariki - Diamond Platnumz (Tanzania)

2. Msanii bora wa kike Afrika mashariki - Cindy Sanyu (Uganda)

3. Mwanamuziki bora wa Kiume Afrika Kusini - Black Coffee (Afrika Kusini)

4. Mwanamuziki bora wa Kike Afrika Kusini - Sally Boss Madam (Namibia)

5. Mwanamuziki bora wa kiume Afrika ya Kati - Wax Dey (Cameroon)

6. Mwanamuziki bora wa kike Afrika ya Kati - Bruna Tatiana (Angola)

7.Mwanamuziki bora wa kiume Afrika Kaskazini - DJ Van (Morocco)

8. Mwanamuziki bora wa kike Afrika Kaskazini - Zina Daoudia (Morocco)

9. Mwanamuziki bora wa kiume Afrika Magharibi - Flavour (Nigeria)

10. Mwanamuziki bora wa kike Afrika Magharibi - Olamide (Nigeria)

11. Mwanamuziki wa Kike mwenye ushawishi mkubwa - Naomi Achu (Cameroon)

12. Msanii bora wa bendi ya /Dou/GroupBand Afrika- Flavour (Nigeria)

13. Msanii anayeinukia vizuri zaidi - Amine Aub (Morocco)

14. Msanii anayependwa na mashabiki kote Afrika - Phyno (Nigeria)

15. Mtunzi wa Mwaka - Unique (Uganda)

16. Tuzo maalum ya utambulizi - King Sunny Ade (Nigeria)

17. Msanii bora /Duo/Group African Hiphop- Stanley Enow (Cameroon)

18. Msanii bora wa muziki wa rege na Dancehall - Patoranking (Nigeria)

19. Msanii bora wa muziki wa Utamaduni Afrika - Zeynab (Benin)

20. Msanii bora wa African Electro -Such (Zimbabwe)

21. Msanii bora wa Afrika katika RnB - Henok na Mehari Brothers (Ethiopia)

22. Msanii bora wa Afrika Muziki wa Rock -M'vula (Angola)

23. Msanii bora muziki wa muziki wa Jazz Afrika - Jimmy Dludlu (South Africa)

24. Kundi bora la muziki Afrika -VVIP (Ghana)

25. Kolabo bora Afrika - Mbilo Mbilo by Eddy Kenzo (Uganda) ft Niniola (Nigeria)

26. Video ya mwaka - Dogo Yaro by VVIP (Ghana)

27. Mwanamuziki Chipukizi wa Mwaka - Falz (Nigeria)

28. Albamu ya mwaka - Ahmed Soultan (Morocco)

29. Wimbo wa mwaka - Utanipenda Diamond Platnumz (Tanzania)

30. Msanii bora wa mwaka -Wizkid (Nigeria)

NGUO YA NDANI YA MKE WA HITLER YAPIGWA MNADA.

NGUO YA NDANI YA MKE WA HITLER ILIYOUZWA.

Nguo ya ndani ya mke wa Adolf Hitler Eva Braun imeuzwa katika mnada kwa pauni 3000.

Suruali hiyo ikiwa ni miongoni mwa vitu vyengine vya bi. Braun ilipigwa mnada katika jumba la mnada la Phillip Serrell huko Melvern ,ikitarajiwa kuvutia pauni 400 lakini ikauzwa kwa pauni 2,900.

Pete ya dhahabu na kiboksi chenye kioo kilichokuwa na lipstiki nyekundu ya Eva Braun pia kiliuzwa.Vyote hivyo viliuzwa kwa mtu binafsi.

Suruali hiyo ilikuwa na kamba ilikuwa na mapambo ya herufi za Eva Braun.

Pete ya dhahabu iliozungukwa na madini iliuzwa kwa pauni 1,250 huku lipstiki hiyo ya rangi ya fedha ikiuzwa kwa pauni 360.

Wakati huohuo picha za rangi nyeupe na nyeusi za Eva Braun na Adolf Hitler ziliuzwa kwa pauni 100.

EVA BRAUN

Wanaoendesha mnada huo wamethibitisha kuwa ziliuzwa kwa mtu binafsi kutoka Uingereza.

RONALDO NA MESSI NI WACHEZAJI WANAOONGOZA KULIPWA PESA NDEFU DUNIANI.

RONALDO

Wachezaji Cristiano Ronaldo na Lionel Messi ndio wachezaji wa mchezo wa soka wanaongoza kwa kulipwa pesa nyingi zaidi duniani kwa sasa.

Ronaldo analipwa kiasi cha Pauni 365,000 kwa wiki huku akijikusanyia kiasi cha pauni milioni 19,kwa mwaka Nae Lionel Messi analipwa kiasi cha Pauni 365,000 kwa wiki huku nae akipata pauni million 19 kama Ronaldo kwa mwaka.

MESSI

Wachezaji wengine wanaolipwa pesa nyingi duniani

Gareth Bale (Real Madrid) Pauni 346,000 kwa wiki, Pauni Milioni 18 kwa mwaka

Givanildo Vieira de Sousa maarufu kama Hulk (Shanghai SIPG) Pauni 317,000 kwa wiki Pauni Milioni 16.5 kwa mwaka

Paul Pogba (Manchester United) Pauni 290,000 kwa wiki Pauni Milioni 15 kwa mwaka

Neymar (Barcelona) Pauni 289,000 kwa wiki Pauni Milioni 15 kwa mwaka

Graziano Pelle (Shandong Luneng) Pauni 260,000 kwa wiki Pauni Milioni 13.5 kwa mwaka

Wayne Rooney (Manchester United) Pauni 260,000 kwa wiki, Pauni Milioni 13.5 kwa mwaka

Zlatan Ibrahimovic (Manchester United) Pauni 250,000 kwa wiki, Pauni Milioni 13 kwa mwaka

Sergio Aguero (Manchester City) Pauni 240,000 kwa wiki, Pauni Milioni 12.5 kwa mwaka

Yaya Toure (Manchester City) Pauni 240,000 kwa wiki, Pauni Milioni 12.5 kwa mwaka

TB JOSHUA ATABIRI CLINTON KUSHINDA UCHAGUZI JAPO KWA USHINDI MDOGO.

TB JOSHUA

Muhubiri maarufu wa vipindi vya Televisheni nchini Nigeria TB Joshua amesema ametabiri " kwamba Hillary Clinton atamshinda Donald Trump" katika uchaguzi wa urais wenye ushindani mkali tarehe 8 Novemba mwaka huu.

Katika ujumbe alioutuma kwenye ukurasa wake wa Facebook TB Joshua amesema kuwa Bi Clinton atashinda kwa ushindi mdogo, lakini atakabiliwa na changamoto nyingini - likiwemo jaribio la kupiga kwa kura ya kutokuwa na imani dhidi yake.

"boti ya rais mpya itakuwa imefungwa," aliongeza.

TB Joshua ni mmoja wa viongozi wa kidini wenye ushawishi na utata barani Afrika, huku wengi wa wafuasi wake wakiamini kuwa "utabiri " wake ni wa uhakika.

KIFO CHA SITTA NI PIGO KWA TIMU YA SIMBA.

ADEN RAGE

Katibu wa Zamani wa Klabu ya Simba, Aden Rage amesema kifo cha Spika wa Bunge mstaafu Samwel Sitta ni pigo kwa wapenzi wa klabu hiyo kwa kuwa ndiye aliyeshiriki kuitunga katiba ya klabu hiyo.

Akizungumza jana (Jumatatu),  Rage amesema huwezi kutaja katiba ya klabu hiyo bila kutaja jina la Sitta.

Rage amesema Sitta wakati wa uhai wake alikuwa mwanachama na mpenzi Mkubwa wa Simba.

Amesema kuna kipindi hata jezi za klabu hiyo zilikuwa zinafuliwa nyumbani kwake.

Amesema Sitta ametoa mchango mkubwa katika maendeleo ya klabu hiyo ambayo mengine ni vigumu kuyataja.

MWENYEKITI WA AZAM AFARIKI NA KUZIKWA LEO SAA KUMI JIONI.

MAREHEMU SAID MOHAMED

Mwenyekiti wa Azam FC, Said Mohamed ‘Mzee Said’ amefariki dunia na anatajiwa kuzikwa leo saa 10:00 jioni kwenye makaburi ya Kisutu jijini Dar es Salaam.

Makamu Mwenyekiti wa Azam, Idrissa Nassor amesema Mzee Said amefariki katika Hospitali ya Aga Khan alikolazwa kutokana na kusumbuliwa na shinikizo la damu na ugonjwa wa figo.

“Ni kweli tumepatwa na msiba wa mzee wetu, Mzee Said. Amefariki dunia jioni hii (jana jioni) na alikuwa amelazwa Hospitali ya Aga Khan kutokana na matatizo ya shindikizo la damu na figo,” amesema Nassor.

Nassor ameongeza kuwa swala ya kumuombea marehemu itafanyika katika Msikiti wa Maamur uliopo Upanga kisha kuzikwa kwenye makaburi hayo ya Kisutu.

Enzi za uhai wake, Mzee Said alikuwa ni mmoja wa waanzilishi wa klabu ya Azam FC na mwenyekiti wa klabu hiyo hadi mauti yalipomfika. Pia alikuwa Meneja wa Kampuni ya Said Salim Bakhresa.

MAMBA MLA WATU AUAWA.

Mamba mla watu aliyekuwa tishio kwa wakazi wa Kijiji cha Kakobe katika Halmashauri ya Buchosa, Wilaya ya Sengerema mkoani Mwanza, ameuawa na wananchi na kuchunwa ngozi.

Ofisa Mtendaji wa Kata ya Kazunzu, Timotheo Sengerema amesema kuuawa kwa mamba huyo kumewaondolea hofu wakazi hao waliolazimika kusitisha shughuli za uvuvi ndani ya ziwa hilo wakihofia kuuawa na kuliwa.

“Kabla ya kunaswa na kuuawa juzi, mamba huyo alikuwa amewauwa wavuvi watatu walipokuwa kwenye shughuli zao za uvuvi,” amesema Sengerema.

Amesema kazi ya kumtega na kumnasa mamba huyo ilitekelezwa na mmoja wao mwenye ujuzi wa kazi hiyo, Lucas Dambaya kwa ahadi ya kulipwa Sh1 milioni zilizochangwa na wanakiji hao.

“Kazi ya kumtega na kumnasa mamba huyo ambaye wanakijiji  walimchuna ngozi kabla ya kuukabidhi mzoga wake kwa uongozi wa kata ilichukua siku mbili,” amesema Sengerema.

Akizungumza baada ya kumnasa mamba huyo, Dambaya amesema ataendelea kuweka mitego kuwanasa mamba wengine ambao  bado wako kwenye mwalo wa kijiji hicho na kuwataka wakazi hao kuchukua tahadhari wanapofanya shughuli zao ziwani humo.

Mwenyekiti wa kijiji hicho, George Mambile amesema kwa kipindi cha miezi mitatu, wakazi hao walikuwa wakiishi kwa hofu ya kudakwa na mamba huyo mla watu.

Aliushukuru uongozi wa kata kwa kusaidia juhudi za kumkamata na kumuua mamba huyo.

MANENO MATATU YA MWISHO YA SITTA KABLA YA KIFO.

MAREHEMU SAMWEL SITTA

Kabla ya kifo chake Spika wa Bunge mstaafu, Samuel Sitta alisema maneno matatu ya Kiingereza, “that is life” (hayo ndiyo maisha).

Sitta alitamka maneno hayo baada ya kuambiwa na daktari wake kwamba hawezi kupona ugonjwa unaomsumbua.

Akizungumza jana nyumbani kwa marehemu, Benjamin Sitta ambaye ni mtoto wa Sitta alisema baada ya kuzungumza maneno hayo baba yake alifariki dunia.

Alisema baada ya kuelezwa ukweli huo na daktari, baba yake alikubali kwamba huo ndiyo mwisho wa maisha yake hapa duniani.

“Tumepoteza baba na kiongozi ambaye tulimtegemea kwa ushauri wa masuala mbalimbali, tutafuata yale aliyokuwa akituelekeza,” alisema Benjamin ambaye pia ni Meya wa Manispaa ya Kinondoni.

Sitta alifariki dunia saa 10.50 alfajiri kwa saa za Tanzania  wakati akipatiwa matibabu ya saratani ya tezi dume katika Hospitali ya Technical University of Munuch nchini Ujerumani.

Mwezi uliopita mbunge huyo wa zamani wa Urambo Mashariki alirejea nchini akitokea Ujerumani alikokuwa akitibiwa, lakini wiki iliyopita alienda tena kwa ajili ya matibabu zaidi.

Benjamin alisema marehemu atazikwa wilayani Urambo mkoani Tabora, lakini ratiba ya mazishi ingetolewa na ofisi ya Bunge ambayo inaratibu msiba huo.

“Kwa sasa hatujui mwili utawasili nchini lini, utaagwa lini na atazikwa lini ila tunachofahamu ni kuwa atazikwa Urambo,” alisema.

Benjamin alisema masuala mengine yanayohusu familia hiyo yatazungumzwa na mama yake, Magareth Sitta ambaye bado yuko Ujerumani. “Mambo mengine naomba niyaache yatazungumzwa na mama baada ya kurudi nchini, unajua sasa yeye ndiyo nguzo ya familia, hivyo ni vizuri tukamsubiri yeye,” alisema.

Nyumbani kwa marehemu

Watu walikusanyika nyumbani kwa marehemu  Masaki jijini Dar es Salaam tangu saa 2.30 asubuhi jana baada ya taarifa za kifo hicho kusambaa kupitia vyombo vya habari na mitandao ya kijamii.

Miongoni mwa waliofika mapema ni Mwenyekiti wa CCM Mkoa wa Dar es Salaam, Ramadhani Madabida ambaye alimwelezea Sitta kuwa atakumbukwa kwa mchango mkubwa katika Serikali na chama hicho.

“Sitta alikuwa kiongozi mwadilifu na aliyesimamia haki katika Serikali na CCM, ndiyo maana wakati wa uhai alikuwa mtu wa watu,” alisema Madabida.

Alisema ukiondoa nyadhifa nyingine za uwaziri, uspika na uenyekiti wa Bunge la Katiba, Sitta atakumbukwa kwa kuongoza vizuri Kituo cha Uwekezaji Tanzania (TIC).

Mbunge wa zamani wa Tabora Mjini, Aden Rage alisema mafanikio yake katika siasa ulikuwa ni mchango mkubwa alioupata kutoka kwa Sitta.

“Ni pigo kubwa kuondokea na mtu wa aina ya Sitta, busara zake tulizitegemea kupata ushauri, maneno yake yataendelea kuishi vichwani mwetu,” alisema.

Akiungana na Rage, mdogo wa marehemu, Paulo Sitta alisema kaka yake alikuwa mlezi wa familia na ndugu zake kwa ujumla.

“Familia na ndugu zake tumepata pigo kwa kuwa alikuwa mlezi wetu,” alisema.

 Rais Magufuli atuma salamu

Rais John Magufuli amemtumia salamu za rambirambi Spika wa Bunge, Job Ndugai kufuatia kifo cha Sitta.

Rais Magufuli alisema amepokea kwa mshtuko na masikitiko makubwa taarifa za kifo cha Sitta na kwamba Taifa limempoteza mtu muhimu aliyetoa mchango mkubwa katika uongozi na maendeleo.

“Nitamkumbuka Mzee Sitta kwa uchapakazi wake, uzalendo wake na tabia yake ya kusimamia ukweli katika kipindi chote alichokuwa kiongozi katika ngazi mbalimbali za siasa na Serikali,” alisema.

Rais alitoa pole kwa mke wa marehemu, Magareth Sitta ambaye ni mbunge wa Jimbo la Urambo, familia, wabunge, wananchi wa Urambo na wote walioguswa na msiba huo.

Salamu za CCM

Katika taarifa yake, CCM ilisema imepokea kwa majonzi na simanzi kubwa taarifa za kifo cha Sitta ambaye amewahi kushika nyadhifa mbalimbali za utumishi katika chama na Serikali.

Akiwasilisha salamu za rambirambi za Katibu Mkuu wa CCM, Abdulrahman Kinana kwa Spika Ndugai, Msemaji wa CCM, Christopher ole Sendeka alisema Sitta alikuwa ni kiongozi mchapakazi, mwadilifu na aliyejitambulisha kwa utendaji wenye kufuata falsafa yake ya “kasi na viwango”.

TANESCO KUONGEZA BEI YA UMEME MWAKANI.

Mchakato wa kukusanya maoni ya wadau kwa ajili ya ombi la Shirika la Umeme Tanzania (Tanesco) la kuongeza bei ya nishati hiyo kwa wastani wa asilimia zaidi ya 18.9 ifikapo mwaka 2017, unatarajia kuanza.

Taarifa iliyotolewa na Mamlaka ya Udhibiti wa wa Huduma za Nishati na Maji (Ewura) imeeleza kuwa Oktoba 4, mamlaka hiyo ilipokea ombi la mabadiliko ya bei ya umeme, hivyo unaandaliwa mkakati wa kukusanya maoni ya wadau wa nishati hiyo.

“Mikutano ya ukusanyaji maoni kuhusu bei inayopendekezwa na Tanesco itaanza Novemba 16 katika mikoa ya Mwanza, Mbeya, Arusha, Dodoma  na kwa Dar es Salaam ni Novemba 23,” inaeleza taarifa hiyo. 

Hatua hiyo imekuja ikiwa ni miezi saba tangu kutangazwa kwa bei mpya ya umeme iliyokuwa na punguzo la asilimia 1.5 hadi 2.4 sanjali na kuondoa tozo ya kuunganishiwa umeme ya Sh5,000 na gharama ya huduma kwa kila mwezi ambayo ilikuwa na Sh5,520.

Mkurugenzi Mkuu wa Tanesco, Felchesmi Mramba alisema shirika hilo limefanya tathmini na kujiridhisha kuwa hakuna hasara itakayopatikana endapo bei hiyo itatumika.

SAMATTA KURUDI KUISAIDIA TAIFA STARS DHIDI YA ZIMBAMBWE.

MBWANA SAMATTA

Nahodha wa timu ya soka ya taifa ya Tanzania, Taifa Stars, Mbwana Samatta anatarajiwa kuwasili jijini Dar es Salaam kesho Jumatano kujiunga na kikosi cha timu hiyo kwa ajili ya mchezo wa kirafiki dhidi ya Zimbabwe mwishoni mwa wiki.

Kwa mujibu wa taarifa za mitandao ya kijamii za jana, Samatta aliondokana jana Genk, Ubelgiji kupitia Dubai kabla ya kutua jijini Dar es Salaam kesho.

Samatta ameendelea kuonesha umuhimu wa kuichezea Taifa Stars kwa kuitikia mwito wa kocha Charles Boniface Mkwasa licha ya kuwa na majukumu mazito katika klabu yake. Klabu yake hiyo mbali na kushiriki Ligi Kuu ya Ubelgij, pia inashiriki katika Ligi ya Ulaya.

Wachezaji 24 walioitwa na Mkwasa kwa ajili ya mchezo huo wa Novemba 13 mjini Harare, walitarajia kuingia kambini jana.

Wachezaji wa Taifa Stars walioitwa na Mkwasa ni makipa;Deogratius Munishi ‘Dida’ wa Yanga, Said Kipao wa JKT Ruvu na Aishi Manula wa Azam FC.

Mabeki; Erasto Nyoni, David Mwantika wa Azam FC, Michael Aidan wa JKT Ruvu, Mwinyi Hajji, Vincent Andrew wa Yanga, Mohammed Hussein ‘Tshabalala’ wa Simba SC na James Josephat wa Prisons.

Viungo wa kati: Himid Mao wa Azam FC, Mohammed ‘Mo’ Ibrahim, Jonas Mkude na Muzamil Yassin wa Simba SC, wakati viungo wa pembeni ni Abdulrahman Mussa wa Ruvu Shooting, Shizza Kichuya, Jamal Mnyate wa Simba SC na Simon Msuva wa Yanga.

Washambuliaji ni Ibrahim Ajib wa Simba SC, John Bocco wa Azam FC, Elius Maguli wa Oman Club, Thomas Ulimwengu aliyemaliza mkataba wake TP Mazembe ya DRC na kuondoka mwezi uliopita, Omar Mponda wa Ndanda FC na Nahodha Mbwana Samatta wa K.R.C Genk ya Ubelgiji.

MAANDALIZI YA MAZISHI YA SITTA YANAENDELEA.

Maandalizi ya maziko ya Spika mstaafu na mwanasiasa mkongwe wilayani Urambo mkoani Tabora, Samuel Sitta yanaendelea huku ndugu na jamaa wa karibu wakiendelea kuwasili wilayani humo.

Akizungumza nyumbani kwa marehemu mjini Urambo jana, mdogo wake Peter Sitta alisema maandalizi yanaendelea huku wakiendelea kusubiri taarifa za ratiba kutoka kwa Kamati ya Bunge iliyoundwa kuratibu.

Peter alisema awali alipokea taarifa za ambazo zilikuwa zikieleza kuwa hali ya Spika mstaafu si nzuri baada ya kupigiwa simu saa 11:50 alfajiri, na baada ya muda kidogo alipigiwa simu na kufahamishwa kuhusu msiba kutoka huko kwenye matibabu nchini Ujerumani.

Alifafanua kuwa alishtuka sana kwani ni siku chache tu alikuwa anawasiliana naye wakijuliana hali kwani hata yeye hali yake siyo nzuri.

“Nimestushwa sana kwani nimeongea naye kwenye simu akanijulisha afya yake na kusema anaendelea vizuri na matibabu na yeye Samuel alimuuliza kuhusiana na afya yangu kwani hata mimi naumwa pia,” alieleza Peter.

Alieleza kabla ya kifo chake walizungumza kwenye simu baada ya ndugu aliyekuwa akimuuguza kumwambia waongee na ndipo aligundua hali siyo nzuri kwani alikuwa anaongea kwa taabu mno.

Alieleza kuwa kutokana na mazungumzo yale aligundua hali ya kaka yake si nzuri.

Akizungumzia maandalizi ya maziko, alisema hadi sasa haijafahamika kwani kuna Kamati ya Bunge iliyoundwa ambayo imekuwa ikiratibu maandalizi yote na baada ya mwili kuwasili kutokana Ujerumani ndipo kutakuwa na taarifa sahihi za mazishi.

Mwenyekiti wa CCM Mkoa wa Tabora, Hassan Wakasuvi alilieleza gazeti hili kuwa msiba huo, umemshitusha na hakutarajia.

Alisema amepokea kwa masikitiko makubwa kwani chama kimepoteza shujaa wa kisiasa mkoani Tabora na nchi kwa ujumla. Katibu wa CCM Wilaya ya Urambo, Innocent Nanzabar alisema Mkoa wa Tabora na wilaya ya Urambo, wamepoteza mtu muhimu kwao.

Alisema Sitta alifahamika kama ‘chuma cha pua’ hivyo kuzoeleka kwake na jamii itawachukua muda kumsahau. Alisema atakumbukwa kwa mengi kwa jinsi alivyokuwa mpigania haki, mchukia rushwa na kamwe hakupenda uonevu kwa wanyonge na serikali kwa ujumla.

Mama mzazi wa Sitta, Hajjat Zuwena Saidi Fundikira akizungumza kwa masikitiko huku akibubujikwa na machozi, alisema hana cha kusema zaidi ya kulia.

“Nilipokea taarifa hizi kutoka kwa mwanangu Peter John Sitta baada ya kufika nyumbani huku akilia na baada ya kunyamaza ndipo alinieleza kuwa kuna msiba,” alisema na kuongeza kuwa kamwe hatamsahau mtoto wake kwani bila ya marehemu yeye asingeijua ibada ya hija kwani alimpenda katika maisha yake.

WAFUASI WA CHADEMA WAKAA MASAA SABA KUMSUBIRI LEMA KORTINI.

GODBLESS LEMA

Wafuasi wa Chama cha Demokrasia na Maendeleo (Chadema) wamekaa kwa muda wa saa saba wakimsubiri Mbunge wa Arusha Mjini, Godbless Lema kufikishwa Mahakama ya Hakimu Mkazi Arusha.

Wafuasi hao akiwemo Mwenyekiti wa chama hicho Kanda ya Kaskazini, Amani Golugwa na Mbunge wa Viti Maalumu, Joyce Mukya walikuwa wamekaa kwa saa kadhaa kumsubiri Mbunge huyo.

Walisubiri bila mafanikio huku saa za mahakama zikiwa zinayoyoma.

Lema ambaye hadi jana anasota mahabusu kwa siku ya sita sasa, hata hivyo ilipofika saa saa 8:52 mchana Wakili wa Mbunge Lema, John Mallya alisema inashangaza hadi sasa ni kwa nini Mbunge huyo alikuwa hajafikishwa mahakamani.

Mallya alisema Lema alikamatwa Jumatano iliyopita mkoani Dodoma na kuletwa hadi Arusha na amekaa mahabusu kwa zaidi ya saa 175 na ni kinyume cha haki za binadamu kwani Polisi wanapaswa kukaa na mshitakiwa kwa saa 24.

Alisema wamefungua kesi ya jinai namba 56/2016, ambayo ipo kwa Jaji Salma Magimbi ambaye atasikiliza kesi hiyo kesho asubuhi.

Katika kesi hiyo waliyofungua mahakamani hapo jana ni kutaka Lema aitwe mahakamani ili kesi yake ya msingi anayoshtakiwa nayo isomwe na mshitakiwa apate dhamana.

Pili wamemshtaki Mkuu wa Kituo cha Polisi, Mkuu wa Upelelezi wa Makosa ya Jinai (RCO), Kamanda wa Polisi (RPC), Mkuu wa Jeshi la Polisi (IGP) na Mwanasheria Mkuu wa Serikali ambao pia katika kesi hiyo waliyofungua, wakili Mallya anataka walipwe gharama za usumbufu wa kesi ikiwemo kufuatilia huku na kule ili Lema atoke.

Katibu wa Chadema Kanda ya Kaskazini, Amani Golugwa alidai utawala wa sheria unagandamizwa na sheria imekiukwa.

WATAKAO PERFOM KATIKA TUZO ZA AMERICAN MUSIC AWARDS (AMA).

Katika list ya tuzo kubwa zinazotolewa kwa wanamuziki duniani huwezi kuacha kutaja American Music Awards ambazo hutolewa kila mwaka kwa mastaa wakubwa wa muziki Marekani, tukio hilo ambalo lipo kwenye maandalizi sasa hivi na tuzo hizo kutolewa usiku wa Nov 20 2016 ambazo zitaonyeshwa live  kwenye kituo cha  ABC.

Na tayari list imetoka ya wasanii wa marekani watakaotoa burudani kwenye jukwaa la usiku wa tuzo hizo za AMAs 2016 ambapo watakuwepo wasanii hawa…

LADY GAGA

BRUNO MARS

TWENTY ONE PILOTS

JOHN LEGEND

ARIANA GRANDE & NICK MINAJ

SHAWN MENDEZ

JAMES BAY

FIFTH HARMONY

GREEN DAY

CHAINSMOKERS & HALSEY

THE WEEKEND.