TIWA SAVAGE MBIONI KURUDIANA NA MUMEWE.

TIWA SAVAGE.

LAGOS, Nigeria

Ikiwa ni takribani miezi sita tangu mwanamuziki mahiri Tiwa Savage atengane na mumewe, Tunji Balogun maarufu kama  Tee Billz, mkali huyo anasemekana kuwa mbioni kurejea katika uhusiano na mumewe huyo wa zamani.

Kwa mujibu wa vyanzo vya habari vilivyopo karibu na mwimbaji huyo, kwa jinsi anavyoonekana katika mazungumzo yake kinara huyo yupo tayari kurudiana na mzazi mwenzake huyo.

“Tayari familia zote mbili zimeshakutana kwa ajili ya kufanya majadiliano ya amani,” kilieleza chanzo cha habari.

“Unaweza usiamini maneno yangu lakini maridhiano kati ya Tiwa na Teebillz yapo mbioni. Ameshawaeleza watu wa karibu  kwamba ana mkosa sana Tunji na anataka arejee katika maisha yake. Vilevile wana mtoto wao wa kiume Jamal (Jam Jam) na  pia Tiwa anataka mwanawe akue akiwa karibu na wazazi wake,” kiliongeza chanzo hicho.

Chanzo hicho kilikwenda mbali zaidi kikieleza kuwa mwanamama huyo pia amempa masharti Teebillz kuhakikisha masuala yote ambayo yalianikwa hadharani kisitokee tena.

Mbali na vyazo hivyo, Tiwa vilevile mwenyewe binafsi alisema kuwa alishakutana na mumewe pamoja na washauri ambao walimweleza kuipa nafasi tena ndoa yake na kuheshimu kiapo ambacho alikula madhabauni.

UTAFITI:VINYWAJI VYA KUONGEZA NGUVU HUSABABISHA MATATIZO YA INI.

Unywaji wa mara kwa mara wa vinywaji vinavyoongeza nguvu mwilini ‘energy drinks’ unasababisha ini kushindwa kufanya kazi (acute hepatitis).

Kwa mujibu wa ripoti za magonjwa zilizochapishwa kwenye  jarida la BMJ Case Reports Novemba Mosi mwaka huu, mwanamume mmoja mwenye umri wa miaka 50 amepata tatizo hilo baada ya kunywa ‘energy drinks’ mara kwa mara kwa muda wa wiki tatu.

Matatizo ya ini husababishwa na utumiaji wa dawa mara kwa mara pamoja na vidonge vya lishe hususani vya vitamin na wakati mwingine husababisha ini kufa kabisa.

Mwanamume huyo alimweleza daktari kuwa alikuwa anaumwa kwa wiki mbili akisumbuliwa na maumivu ya tumbo, kukosa hamu ya kula, kichefuchefu na kutapika.

Daktari aliyekuwa akimtibu aliandika katika jarida hilo kuwa awali mwanamume huyo alifikiri anaumwa mafua hadi aliposhtuka baada ya kuona anakojoa mkojo mweusi na ngozi ikiwa ya manjano.

Timu ya madaktari iliyokuwa ikiongozwa na Dk.  Jennifer Harb, mtaalamu wa ngozi na magonjwa yake wa Chuo Kikuu cha Tiba cha Florida walifanya utafiti kuhusu uhusiano wa matatizo ya ini na unywaji wa vinywaji vya kuongeza nguvu.

Madaktari hao waligundua kuwa mwanamume huyo hakuwa amepata aina yoyote ya matibabu wala kunywa dawa ila alikiri kuwa amekuwa akinywa chupa nne hadi tano kwa siku za vinywaji hivyo kwa muda wa wiki tatu.

Wakati wa vipimo waligundua kwamba maumivu ya tumbo ya mtu huyo yalikuwa yanatoka karibu kabisa na ini.

Madaktari walifanya vipimo zaidi ikiwamo kupima damu na majimaji ya ini ndipo walipogundua kuwa ini lake limepata matatizo. Pia mtu huyo aligundulika kuwa na homa sugu ya ini (hepatitis C).

Iligundulika kuwa vinywaji alivyokunywa vilikuwa na wingi wa vitamin B3 vikiwa na miligramu 40 ikiwa ni zaidi ya miligramu 20 zinazoshauriwa kwa siku.

Kwa sababu alikuwa anakunywa  chupa nne hadi tano kwa siku, madaktari hao wameandika alikuwa anakunywa  160 gm hadi 200 mg kwa siku.

Utafiti wa awali unaonyesha kuwa kula zaidi ya 500 mg za vitamin B3 kwa siku kunasabaisha sumu katika ini.

Madaktari hao wanasema kwa sabau alikuwa anakunywa kiasi cha 500 mg, atakuwa ameathirika kwa mlundikano wa vitamin hiyo kwa siku alizokuwa anakunywa vinywaji hivyo.

Kisa hicho kinafanana na kisa kilichoripotiwa katika jarida la ripoti za magonjwa la mwaka 2011 ambapo mwanamke mmoja aliripotiwa kupata matatizo ya ini baada ya kunywa vinywaji vya kuongeza nguvu kwa wiki mbili.

Iliripotiwa kuwa mwanamke huyo alikuwa anakunywa 300 mg za vitamin B3 kwa siku kwa kunywa vinywaji hivyo.

Madaktari hao wanasema kuna uwezekano kwamba vitu vingine vilivyopo kwenye vinywaji hivyo vilisababisha baadhi ya dalili licha ya kwamba hakuna taarifa za kutosha za kudhibitisha hilo.

JANUARY MAKAMBA NA SHINDANO LA KUTAFUTA MBADALA WA MKAA.

JANUARY MAKAMBA.

Waziri wa Nchi, Ofisi ya Makamu wa Rais (Muungano na Mazingira), January Makamba leo amezindua Shindano la Kitaifa la Kutafuta Mbadala wa Mkaa ambapo mshindi wa kwanza atashinda kiasi cha Sh 300 milioni.

Amesema madhumuni ya msingi ya shindano hilo ni kuwatambua, kuwatuza, kuwawezesha na kuwaendeleza wabunifu na wajasiriamali wanaojihusisha na mbinu, jitihada za uzalishaji, usambazaji na matumizi ya nishati endelevu za kupikia.

“Natoa wito kwa wadau wote: watu binafsi, wabunifu, kampuni binafsi, wajasiriamali, asasi za kiraia na kijamii, taasisi zisizokuwa za kiserikali, taasisi za elimu ya juu, na taasisi za utafiti, kushiriki katika changamoto hii.”

Amesema moja ya madhumuni ya ziada ya shindano hilo ni kuwaleta pamoja wadau na wabunifu wanaojishughulisha na harakati za kutafuta na kutumia nishati mbadala wa mkaa.

FLAVIANA MATATA-USHINDI WA TRUMP UMENISHTUA.

Mwanamitindo wa kimataifa anayefanya shughuli zake nchini Marekani, Flaviana Matata, amepongeza ushindi wa Bilionea Donald Trump dhidi ya Hillary Clinton kwenye Uchaguzi Mkuu wa Rais nchini humo.

Akizungumza na MTANZANIA, Flaviana Matata alisema yeye hakuwa shabiki wa masuala ya siasa nchini humo, ila alikuwa anavutiwa na sera za mgombea wa Chama cha Democratic, Hillary Clinton na ushindi wa Chama cha Republican kupitia Donald Trump, ameupokea kwa mshtuko kama ilivyo kwa watu wengi. “Sikuwa shabiki wa Trump ila ushindi wake umenifanya nikubali japo sikutegemea kutokana na kufanya kampeni chafu, nilipenda sana sera za Hillary na nilikuwa nataka ashinde ili aweke historia ya mwanamke wa kwanza kuiongoza dunia,” alisema Flaviana.

Kuhusu hofu iliyotawala kwenye mitandao ya kijamii juu ya watu wasio wa taifa hilo kupata misukosuko kufuatia vitisho alivyowahi kuvitoa Donald Trump kwenye kampeni zake, Flaviana Matata alisema uraisi ni taasisi, hivyo hata kama ana maamuzi yake ni lazima utafuata taratibu utakazozikuta ofisini. “Unaweza kuwa na mipango yako mibaya lakini ukishakalia kiti cha urais, ni lazima utaongoza kwa kufuata taratibu utakazozikuta. Si rahisi kufanya maamuzi ya kukurupuka, unajua ukiwa Rais wa Marekani unakuwa kiongozi wa dunia, hivyo najua Trump atakuwa makini kwa hilo,” alisema Flaviana.

WAFAHAMU WATOTO NA WAKE MACHACHARI WA TRUMP.

1. Barron Trump ndiye mwana wa pekee wa Donald na mke wake wa sasa Melania. Ingawa alijitokeza katika mikutano kadha ya kampeni, mvulana huyu wa miaka 10 hajakuwa akioneshwa sana hadharani. Hucheza gofu na babake na anaaminika kuzungumza Kislovenia kwa ufasaha.

2. Melania Trump, ni mwanamitindo wa zamani, mzaliwa wa Slovenia, ambaye aliolewa na Donald Trump Januari 2005. Alijitokeza na kumtetea mumewe baada ya kanda ya video kutokewa wakati wa kampeni na kumuonesha akijitapa kuhusu kuwadhalilisha kimapenzi wanawake.

3. Jared Kushner ni mume waIvanka, binti mkubwa wa Donald. Bw Kushner ni mwana wa mfanyabiashara tajiri wa New York anayefanya biashara ya nyumba ya ardhi. Amekuwa pia mmiliki wa gazeti la kila wiki la Observer jijini New York kwa miaka 10. Kushner, ambaye ni Myahudi, anadaiwa kuwakera watu wa familia yake alipoandika makala kutetea hatua ya Donald Trump kutumia Star of David (Nyota ya Daudi ambayo ni nembo ya Wayahudi) kwenye ujumbe kwenye Twitter akimshambulia Hillary Clinton. Akiandika kwenye gazeti hilo lake, alisema: "Shemeji yangu hana chuki dhidi ya Wayahudi".

4. Ivanka Trump labda ndiye mwana wa Donald Trump anayefahamika zaidi na watu. Ndiye binti wa pekee wa mke wa kwanza wa Trump, Ivana. Alikuwa mwanamitindo mzamani lakini sasa ni makamu wa rais wa shirika la The Trump Organization na pia jaji katika kipindi cha runinga cha babake cha The Apprentice. Alibadili dini na kujiunga na didi ya Kiyahudi baada ya kuolewa na Jared mwaka 2009.

5. Tiffany Trump ni binti wa Donald Trump kutoka kwa mke wake wa pili Marla Maples, mwigizaji wa zamani na nyota wa TV. Hutumia sana Twitter na Instagram, na ujumbe wake mitandao ya kijamii huashiria maisha ya kifahari.

TIFFANY TRUMP

6. Vanessa Trump, ambaye jina lake la kuzaliwa ni Haydon, aliolewa na Donald Trump Jr mnamo Novemba 2005. Wawili hao wamejaliwa watoto watano, akiwemo Kai, mwenye umri wa miaka minane (pichani). Vanessa alianza uanamitindo akiwa mtoto na wakati mmoja alikuwa mpenzi wa Leonardo DiCaprio.

7. Kai Trump ndiye kifungua mimba wa Vanessa na Donald Jr, ambao wamejaliwa watoto watano.

8. Donald Trump Jr ndiye mwana wa kwanza wa kiume wa Donald Trump na mke wake wa kwanza Ivana. Kwa sasa ni makamu wa rais mtendaji wa shirika la The Trump Organization. Alimuoa Vanessa Haydon baada ya wawili hao kukutanishwa katika hafla ya maonyesho ya mitindo na babake.

DONALD TRUMP JR

9. Eric Trump ndiye mwana wa tatu wa Trump na Ivana. Sawa na nduguze, yeye pia ni makamu wa rais mtendaji wa Trump Organization. Yeye pia ni rais wa Trump Winery jimbo la Virginia na husimamia klabu za gofu za Trump.

10. Lara Yunaska, ni mwandaaji vipindi wa zamani katika runinga na hushiriki mashindano ya mbio za farasi. Aliolewa na Eric mwaka 2014. Aliumia vifundo vya mikono yake miwili akipanda farasi wiki mbili kabla ya harusi yake, sherehe iliyoongozwa na Jared Kushner. Wawili hao hawana mtoto, lakini wana mbwa kipenzi.

UCHUNGUZI DHIDI YA UKATILI WA BRAD PITT WASITISHWA.

BRAD PITT NA ALIYEKUWA MKE WAKE ANGELINA JOLIE.

Uchunguzi wa madai kwamba Brad Pitt amekuwa na tabia ya ukatili dhidi ya mwanawe wa kiume umesitishwa, vyombo vya habari Marekani vimeripoti.

Maafisa wa huduma kwa jamii mjini Los Angeles wamekuwa wakichunguza madai kwamba Bw Pitt alimgonga Maddox, 15, wakiwa kwenye ndege ya kibinafsi.

Mkewe Angelina Jolie aliwasilisha ombi la talaka siku ambayo kisa hicho kilitokea.

Wawili hao wamekuwa kwenye ndoa kwa zaidi ya mwongo mmoja.

Bw Pitt sasa anapigania kupata haki sawa ya kukaa na watoto wao sita.

Msemaji wa Idara ya Huduma za Familia ya Watoto LA amesema idara hiyo haiwezi kuthibitisha iwapo maafisa wake walimchunguza itt.

Bi Jolie alitaja "tofauti zisizoweza kusuluhishwa" kama sababu yake kuwasilisha ombi la kutaka kuvunja ndoa yao 19 Septemba.

Bw Pitt na Bi Jolie walianza urafiki wakiandaa filamu ya 2005 kwa jina Mr & Mrs Smith, ambapo waliigiza wachumba walio kwenye uhusiano uliokwama. Walioana 2014.

Ndoa hiyo ilikuwa ya pili kwa Pitt, baada yake kutaliniana na nyota mwigizaji wa kipindi cha Friends, Jennifer Aniston.

Kwa Bi Jolie ilikuwa ya tatu baada ya ndoa zake kwa Billy Bob Thornton na Jonny Lee Miller.

Wana watoto sita - Maddox, Pax, na Zahara, ambao ni wa kupangwa, na wa kuzaliwa Shiloh na pacha Knox na Vivienne.

Bw Pitt, 52, na Bi Jolie, 41, walifunga ndoa kwenye sherehe ya harusi ya faraghani eneo la Provence, Ufaransa.

MAELFU WAANDAMANA KUPINGA MATOKEO YA TRUMP.

Rais wa Marekani Barack Obama amemwalika Rais mteule wa Marekani Donald Trump katika White House, huku maandamano ya kupinga ushindi wa Trump yakifanyika miji mingi Marekani.

Rais Obama amesema lengo la mkutano wao litakuwa kujadiliana kuhusu shughuli ya mpito na kupokezana madaraka.

Amesma anataka shughuli hiyo iwe laini na bila matatizo.

Bw Trump wa Republican atakuwa rais wa 45 wa Marekani baada ya kupata ushindi wa kushangaza dhidi ya Hillary Clinton wa chama cha Democratic, chake Rais Obama.

Bw Obama alifanya kampeni kali kumzuia Bw Trump kushinda, na alisema hafai kuongoza. Wakati mmoja alisema hata hafai kuwa mwuzaji dukani.

Lakini rais huyo sasa amewahimiza Wamarekani wote kukubali matokeo ya uchaguzi wa Jumanne.

"Sasa tunatafuta ufanisi wake katika kuunganisha na kuongoza nchi hii," Bw Obama alisema kuhusu Trump.

Licha ya Rais Obama kuhimiza umoja na Bi Clinton kuwaambia wafuasi wake kwamba Bw Trump anafaa kupewa "nafasi ya kuongoza", ushindi wake umezua maandamano katika miji na majimbo kadha Marekani.

Mamia ya waandamanaji wanaompinga Trump walikusanyika nje ya jumba kuu la Bw Trump, Trump Tower eneo la Manhattan jijini New York Jumatano jioni, wakibeba mabango yaliyokuwa na ujumbe "Not my president" (Si Rais wangu), pamoja na mabango mengine.

Polisi hapo awali waliweka vizuizi vya saruji pamoja na kuchukua hatua nyingine za kiusalama nje ya jumba hilo refu linalopatikana barabara ya 5th Avenue, jumba ambalo huenda likawa makao makuu ya Bw Trump wakati wa kipindi cha mpito kabla yake kuingia White House.

Kuliripotiwa pia taarifa za waandamanaji kuziba lango la kuingia jumba la Trump Tower mjini Chicago Jumatano jioni, wakiimba: "No Trump, No KKK, No Fascists USA" (Hatumtaki Trump, Hatutaki KKK, Hatutaki Wafashi Marekani) na "Not my president!" (Si Rais wangu).

Mjini Oakland, California, na Portland, Oregon, waandamanaji waliteketeza bendera za Marekani.

Wakati wa hotuba yake baada ya kutangazwa mshindi mapema Jumatano, Bw Trump aliahidi kuponya vidonda vya migawanyiko, baada ya uchaguzi huo uliokuwa na ushindani mkali, na kuahidi kwamba atakuwa "rais wa Wamarekani wote".

Msemaji wa White House Josh Earnest amesisitiza kwamba Bw Obama atakuwa na uwazi kuhusu kuhakikisha shughuli laini ya mpito atakapokutana na Bw Trump, ingawa aliongeza kwamba: "Sijasema kwamba utakuwa mkutano rahisi."

Rais huyo mteule atasindikizwa kwenda White House Alhamisi na mkewe, Melania, ambaye atakutana na Mke wa Obama, Michelle.

Bw Obama, aliyempongeza mrithi huyo wake kwa njia ya simu mapema Jumatano, alisema si siri kwamba yeye na Bw Trump wana tofauti nyingi.

Lakini aliongeza kwamba wanataka kuhakikisha wanalinda maslahi ya taifa na kwamba alitiwa moyo na yale Bw Trump alikuwa amesema usiku uliotangulia.

Kundi la kushughulikia shughuli ya mpito la Bw Trump litaongozwa na Chris Christie, gavana wa New Jersey, na lina wiki 10 kukamilisha maandalizi hayo.

Rais huyo mteule, ambaye hajawahi kuhudumu katika wadhifa wowote wa kuchaguliwa au kuteuliwa serikalini, amesema kipaumbele chake kitakuwa kufufua na kuimarisha miundo mbinu ya nchi hiyo pamoja na kukuza ukuaji wa uchumi wa taifa hilo maradufu.

Mwenyekiti wa kitaifa wa chama cha Republican Reince Priebus alisema: "Donald Trump anachukulia hili kwa uzito sana," na kuongeza kwamba mfanya biashara huyo tajiri atatumia uwezo wake wa kutetea na kufanikisha mikataba ya kibiashara kuhakikisha mambo mema "yanatendeka kwa Wamarekani" haraka iwezekanavyo.

Kama Rais mteule, Bw Trump ana haki ya kupokea taarifa za kila siku za ujasusi sawa na Rais Obama, ambazo ni pamoja na habari kuhusu operesheni za kisiri za Marekani pamoja na habari za kijasusi zinazokusanywa na mawakala 17 wa ujasusi za Marekani.

Bw Trump na kundi lake wanaaminika kuwa tayari kujaza nafasi kuu za usalama wa taifa haraka iwezekanavyo watakapoingia madarakani.

Lakini haijabainika nani atakuwa kwenye baraza lake la mawaziri au atakayejaza nyadhifa kuu wakati wa utawala wake kama vile mkuu wa majeshi.

Kunao wanaotarajiwa kupewa nyadhifa kuu wakiwemo Christie, spika wa zamani wa bunge Newt Gingrich na meya wa zamani wa New York Rudy Giuliani, mmoja wa washauri wakuu wa Bw Trump ambaye wengi wanasema huenda akafanywa mwanasheria mkuu au mshauri mkuu wa masuala ya usalama wa taifa.

Baada ya kupata hasara kubwa kutokana na ushindi wa kushangaza wa Bw Trump, masoko ya hisa yameanza kuimarika.

WIZKID APOKONYWA TUZO YA MTV EMA NA KUPEWA ALIKIBA.

Katika hatua ambayo imewafurahisha mashabiki wengi wa muziki nchini, MTV EMA wanadaiwa kumpokonya tuzo ya Best African Act na Worldwide Act, Wizkid na kumpa Alikiba ambaye alistahili kushinda.

Siku chache zilizopita, kulitokea sintofahamu baada ya Wizkid kutangazwa mshindi ilhali kwenye website ya tuzo hizo, kura zilionesha kuwa ni Alikiba ndiye aliyeshinda.

Alikiba amethibitisha taarifa hizo wakati akichat live Jumatano hii kwenye ukurasa wake wa Facebook.

Amesema baada ya mashabiki wake kulalamika kuhusiana na mkanganyiko huo, MTV EMA walifuatilia na kukiri kuwa na makosa na kuutumia ujumbe uongozi wake kuwa Alikiba ndiye mshindi halali, na sio Wizkid. “Sasa ndio nimepata confirmation kwamba ni kweli tuzo inakuja Tanzania na vile vile mimi siwezi kuzungumzia, nitasubiri mpaka nizishike,” amesema Kiba.

Muimbaji huyo amedai kuwa habari hizo amezipokea kwa furaha kubwa na kuwashukuru mashabiki wake kwa kumwezesha kushinda na kuwa nyuma yake.

Wakati hup huo Kiba amempongeza Wizkid kwa ushindi wa tuzo nyingine ya Afrima. Kwa upande wa Wizkid, tayari amefuta post zote za Instagram alizokuwa ameweka kushangilia ushindi huo.

ALLY CHOKI KUADHIMISHA MIAKA 30 YA KUIMBA.

Nyota mkongwe wa muziki wa dansi nchini, Ally Choki ‘Mzee wa Farasi’ amesema anatarajia kufanya tamasha kubwa la muziki kuadhimisha miaka 30 tangu kuanza kwake kuimba mwaka 1986.

Onesho hilo litakwenda sambamba na uzinduzi wa wimbo wake mpya unaofahamika kama Natamani na uzinduzi wa kitabu kinachoelezea historia ya maisha yake ya muziki.

Choki alisema tamasha hilo litafanyika Novemba 26, mwaka huu kwenye ukumbi wa Mango Garden na kushirikisha wasanii kadhaa wa zamani na sasa.

“Nimeamua kufanya ziara kwenye vyombo vya habari kwa ajili ya kuelezea kuhusu maadhimisho ya miaka 30 ya muziki wangu, nawahimiza mashabiki wa muziki wa dansi kuja kwa wingi tusherehekee pamoja tukikumbushana burudani za zamani na za wakati huu,”alisema.

Choki alisema ataburudisha kwa nyimbo kumi, ikiwa ni mchanganyiko wa zamani na sasa ambazo zitakuwa ni kama zawadi kwa mashabiki watakaojitokeza siku hiyo.

Msanii huyo licha ya changamoto kadhaa alizopitia katika safari yake ya muziki, alisema anajivunia kupata mafanikio mengi na zaidi akisisitiza umuhimu wa watu kushiriki naye siku hiyo na kujifunza mambo mengi aliyoyaandaa kupitia kitabu chake.

Pia, amewahi kufanya kazi na bendi kadhaa za muziki nchini ikiwemo Kibaha Sound, Lola Afrika, Bantu Group, Twanga Pepeta na kuanzisha bendi yake ya Extra Bongo kabla ya kurudi tena Twanga. Nyimbo alizowahi kuimba ni Baba Jeni, Gubu la Wifi, Chuki Binafsi, Jirani na nyingine kadhaa.

KILICHOMUUA MTOTO ALIYEWEKEWA BETRI.

Taasisi ya Tiba ya Moyo ya Jakaya Kikwete (JKCI), imesema kabla ya mauti kumfika mtoto Happiness Malley aliyewekewa kifaa cha moyo ‘pace maker’ aliugua kifua.

Msemaji wa JKCI, Maulid Kikondo alisema baada ya kupokea taarifa za kifo hicho walichunguza kupitia historia ya ugonjwa wake na kugundua kuwa chanzo cha kifo chake siyo mashine aliyowekewa.

Happiness alifariki Novemba 6 na alizikwa juzi Mbulu mkoani Manyara.

Elitruda Malley ambaye ni mama yake Happiness, alisema kabla ya umauti kumfika, mwanaye aliugua ugonjwa wa kifua kwa zaidi ya wiki moja.

“Baada ya kufanya uchunguzi wetu kutokana na historia yake ya awali, tukagundua kwa vyovyote vile pacemaker ingefeli angerudi katika hali yake ya awali,” alisema Kikondo.

Kikondo alifafanua kuwa pacemaker hiyo ilikuwa inamsaidia kufanya presha yake ikae vizuri na kwamba, iwapo ingefeli na angerudi katika hali yake ya kawaida na asingekufa.

“Inavyoonekana alipata maambukizi, maana wanasema alikuwa anakohoa sana inavyoonekana itakuwa nimonia. JKCI tutatoa maelezo mengine zaidi kuhusu kifo cha Happiness wiki ijayo,” alisema Kikondo.

Malley alisema kabla ya umauti kumfika mwanaye, Jumapili alikuwa mzima na walikwenda kanisani kutoa sadaka ya shukrani kwa mambo aliyowatendea na wakarudi nyumbani salama. “Jumatatu tuliamka salama lakini ghafla hali yake ilibadilika, akaanza kulalamika anajisikia vibaya, tuliamua kumpeleka hospitalini lakini kabla hatujafika Selian alikufa njiani,” alisema.

Mtoto huyo aliyezaliwa akiwa na udhaifu katika misukumo ya mapigo ya moyo, alifanyiwa upasuaji na kuwekewa kifaa hicho Julai 16. Mkurugenzi wa JKIC, Dk Peter Kisenge alisema operesheni hiyo ilifanyika takriban saa moja kwa mafanikio makubwa.

Operesheni hiyo ilishirikisha timu ya madaktari kumi wakiwamo mabingwa kutoka Virginia, Marekani.

HAKUNA MKURUGENZI WA TAASISI ANAYELIPWA MIL.15/=.

MWANASHERIA MKUU WA SERIKALI, GEORGE MASAJU.

Serikali imesema si kweli kuwa posho kwa watumishi wa taasisi za umma zimefutwa, bali marekebisho ya Sheria ya Utumishi wa Umma yamelenga kuipunguzia serikali gharama na tayari hatua zimechukuliwa ambapo kuanzia Julai mwaka huu, hakuna mkuu wa taasisi anayelipwa zaidi ya Sh milioni 15.

Aidha, imesema hakuna Sheria ya Utumishi wa Umma wala yoyote iliyovunjwa na Rais John Magufuli, alipofanya uteuzi wa wakurugenzi watendaji kwa kuwa Katiba ya nchi, inamruhusu kufanya hivyo.

Wakizungumza kwa nyakati tofauti wakati wakifafanua hoja za serikali wakati wa majadiliano ya Muswada wa Sheria ya Mabadiliko ya Sheria mbalimbali Namba 3 wa mwaka 2016, mawaziri wa wizara mbalimbali walisema Rais anaongoza nchi kwa misingi ya sheria.

Mawaziri hao walikuwa wakijibu hoja za wabunge, ikiwemo hoja ya Msemaji wa Kambi Rasmi ya Upinzani Bungeni ya Katiba na Sheria, Tundu Lissu kuhusu muswada huo baada ya kueleza kuwa Rais amevunja sheria za utumishi wa umma, za uchaguzi kuteua baadhi ya makada wa CCM kuwa wakurugenzi watendaji, akijua kuwa watahusika kusimamia uchaguzi na hawatatenda haki kwa vyama vingine.

Akieleza kuhusu hoja hiyo, Waziri wa Habari, Sanaa, Utamaduni na Michezo, Nape Nnauye, alisema “Katika katika Ibara ya 36, inampa Rais mamlaka ya kufuta, kuanzisha na kuteua. Hakuvunja Katiba hata kidogo, amechagua watu watakaomsaidia kufikia malengo na ahadi alizotoa.”

Nape alitaka kauli hizo zipuuzwe, kwani zina lengo la kupoteza ajenda na kuwataka Watanzania kumuamini Rais katika kuwafikisha katika Tanzania mpya kiuchumi.

Akijibu hoja hiyo, Nape alisema, “Ajenda ya Serikali ya Awamu ya Tano ni kurejesha nidhamu ya utumishi wa umma. Watanzania walituamini katika hilo na tunalitekeleza, wapinzani wanataka kuzuia tusitekeleze ajenda yetu”.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Angella Kairuki alisema nia ya serikali ni kuwianisha mishahara na posho ni njema kupunguza gharama na kuanzia Julai hakuna mkuu wa taasisi anayelipwa zaidi ya Sh milioni 15.

Mwanasheria Mkuu wa Serikali (AG), George Masaju katika majumuisho alisema kulikuwa na malalamiko makubwa kuhusu tofauti ya mishahara kati ya mtu wa chini na wa juu, hivyo shera hiyo imelenga kuweka usawa bila upendeleo.

SABABU ZA CLINTON KUSHINDWA HIZI HAPA.

HILLARY CLINTON.

Kwa nini si Hilary Clinton? Ndilo swali ambalo linaulizwa kila kona baada ya mgombea huyo wa chama cha Democtratic kuangushwa na Donald Trump wa Republican katika Uchaguzi Mkuu wa Marekani.

Si rahisi kuamini Clinton kushindwa na mgombea ambaye alikuwa akihubiri sera za kibaguzi na kujenga hofu kwa baadhi ya makundi ya Wamarekani.

Wamarekani wenye asili ya Afrika na Wamexico walionekana kuwa wanamuunga mkono mke huyo wa Rais wa 42 wa Taifa hilo kubwa ulimwenguni.

Kura zao zilionekana kuwa zingeongeza idadi katika kura za raia wengine wa Marekani waliokuwa wanamuunga mkono mgombea huyo wa chama tawala kwa sasa. Lakini baada ya Trump kupata ushindi, maelezo ya kuhalalisha matokeo hayo yanayoshangaza yanaweza kueleweka.

Kwa kawaida, si rahisi kwa chama kilicho madarakani kushinda tena uchaguzi baada ya miaka minane ya vipindi viwili vya urais ukiondoa wakati George H.W. Bush alipoongoza kwa vipindi viwili na kupokelewa na Ronald Reagan, kitu ambacho ni cha kipekee.

Pamoja na utamaduni huo wa kupokezana madaraka baada ya miaka minne, kuna sababu kuu tano zinazoweza kueleza kwa nini Trump, bilionea maarufu Marekani na mtangazaji wa kipindi cha Apprentice, amefanikiwa kumuangusha Clinton aliyeonekana kuelekea kuweka historia ya kuwa mwanamke wa kwanza kuongoza taifa hilo.

Kushindwa kuunganisha makundi

Moja ya sababu kuu ya kuanguka kwa waziri huyo wa mambo ya nje ni kushindwa kuendeleza nguvu ya rais wa sasa, Barack Obama ya kuunganisha makundi ya wananchi wa Marekani.

Wamarekani wenye asili ya Afrika, ya Amerika Kusini na wapiga kura vijana hawakujitokeza kwa wingi kupiga kura kuweza kumuingiza Ikulu Clinton.

Kabla ya matokeo kutangazwa, alikuwa na uhakika wa ushindi. Lakini mwishoni alijikuta akianguka kwenye majimbo yaliyoonekana yako nyuma yake, kama Wisconsin. Aliachwa kwenye majimbo mengine kama Pennsylvania na Michigan.

Wakati alikusanya kura nyingi kutoka kwenye makundi yenye watu wengi ambayo kampeni zake ziliyalenga, hakuweza kufikia idadi ambayo Obama alipata, hata miongoni mwa wanawake.

Idadi kubwa kidogo ya Wamarekani weusi na Walatino walimpa kura nyingi Trump kuliko walivyompigia Mitt Romney kwenye uchaguzi wa mwaka 2012, licha ya kauli zake kali kwa Wamarekani wenye asili ya Afrika, Wamexico na wahamiaji wasio na nyaraka.

Obama, ambaye alishinda urais kutokana na msaada wa Wamarekani wenye asili ya Afrika na jamii za Kilatino, mara kadhaa aliomba wapiga kura weusi kumuunga mkono Clinton.

Lakini, Trump akatumia ujanja kushawishi Wamarekani weusi kwa kuzungumzia maisha yao halisi, akisema wanaishi maisha ya kimaskini, hawana kazi na wanauawa kila wanapotembea mitaani.

“Mtapoteza nini?” alisema katika moja ya hotuba zake.

Trump alisema maneno hayo kwenye moja ya mikutano yake ya kampeni.

“Tutajenga upya makazi ya watu wa chini kwa sababu jamii za Wamarekani wenye asili ya Afrika wako kwenye hali mbaya sana kuliko walivyowahi kuwa,” alisema Trump katika moja ya mikutano yake iliyohudhuriwa na Wamarekani weupe tu.

“Angalia kwenye maeneo yao, utaona hakuna elimu, ajira na ukitembea mitaani unauawa kwa risasi. Wako kwenye hali mbaya – namaanisha, kutoka moyoni kabisa, nchi kama Afghanistan ni salama zaidi kuliko maeneo yao ya sasa.”

Clinton pia hakuwa maarufu miongoni mwa watu weupe kama alivyokuwa kwa Obama. Alipata asilimia 37 ya kura za Wamarekani weupe kulinganisha na asilimia 39 alizopata Obama. Cha ajabu ni kwamba hata Trump alipata asilimia chache kulinganisha na Romney (asilimia 58 kwa 59).

Idadi ya wapiga kura weupe ni asilimia 70, ikiwa imeshuka kutoka asilimia 72 miaka minne iliyopita.

Hata wapiga kura wenye asili ya Asia, ambao ni asilimia 4 tu, hawakumuunga mkono Clinton kama ilivyokuwa kwa Obama.

Wapigakura vijana pia hawakumuunga mkono Clinton na walifanya hivyo kwenye kura za maoni ndani ya Democratic walipompa kura nyingi mpinzani wake, Bernie Sanders na pia walipompendelea zaidi Obama miaka minne iliyopita.

Uchumi

Pia kitendo cha Trump kuwashawishi Wamarekani kuwa sera mbovu za utawala wa sasa na mipango mibovu ya biashara ndiyo iliyoharibu uchumi wa Marekani. Obama alisaidia kuunusuru uchumi wa Marekani kutoka katika janga la kuporomoka kutokana na tatizo la fedha.

Kwa bahati mbaya, kwa upande wa Clinton, Wamarekani wengi hawakuliona hilo. Mishahara isiyopanda na kukua kwa tofauti katika jamii, ni mambo ambayo wengi waliona yanawaathiri. Trump alifanikiwa kuwashawishi kuwa hiyo ilitokana na mikataba mibovu ya biashara na uendeshaji mbovu wa uchumi.

Licha ya mpinzani wake kwenye kura za maoni, Sanders kumbana katika suala hilo, Clinton hakuonekana kuwa na jibu la kutosheleza. Sura yake ya kinyonga katika masuala ya biashara ilionekana na baadaye ikathibitisha na barua pepe zilizovujishwa.

Licha ya tabia ya Trump ya kutoa kauli tata na kushambulia baadhi ya makundi kwenye jamii, Clinton alionekana kushindwa kushawishi wapigakura kuhusu uchumi.

WANAFUNZI HEWA 65,198 WABAINIKA NCHINI.

Jumla ya wanafunzi hewa 65,198 wamegundulika kuwepo katika shule za msingi na sekondari nchini, ambako idadi ya wanafunzi hao isingebainika kiasi cha Sh milioni 931.3 zingepelekwa shuleni kuhudumia wanafunzi hewa kwa mwaka wa fedha 2016/2017.

Katika mkutano na waandishi wa habari jana mjini hapa, Waziri wa Nchi, Ofisi ya Rais, Tawala za Mikoa na Serikali za Mitaa (Tamisemi), George Simbachawene alisema kati ya wanafunzi hao wa shule za msingi ni 52,783 na sekondari ni 12,415.

Simbachawene alisema kazi ya uhakiki wa wanafunzi katika shule za msingi na sekondari ilifanyika mikoa yote nchini kutokana na agizo la Ofisi ya Rais, Tamisemi kwa makatibu tawala wa mikoa yote ya Tanzania Bara.

Alisema waliagizwa kuhakiki idadi ya wanafunzi katika shule zote za msingi na sekondari kwa kulinganisha taarifa ilivyokuwa Machi mwaka huu wakati wa ujazaji wa madodoso ya takwimu za shule za awali, takwimu za shule za msingi, sekondari na nyaraka za mahudhurio ya wanafunzi.

Alieleza kuwa taarifa za idadi ya wanafunzi kabla ya kuhakiki Machi 2016, zilionesha kulikuwa na wanafunzi 9,746,534 wa shule za msingi na wanafunzi 1,483,872 wa shule za sekondari.

“Baada ya uhakiki tuliofanya Septemba mwaka huu, inaonesha kuwepo wanafunzi 9,690,038 wa shule za msingi na wanafunzi 1,429,314 wa shule za sekondari,” alieleza na kuongeza kuwa uchambuzi umeonesha kuwa wanafunzi 52,783 wa shule za msingi na wanafunzi 12,415 wa sekondari hawakutolewa maelezo ya uwepo wao shuleni.

Alisema kwa tafsiri rahisi hao ni wanafunzi hewa kwa shule za msingi na sekondari nchini, ambao idadi hiyo ya wanafunzi hewa kama isingebainika kwenye uhakiki huo na kupelekwa fedha, Sh milioni 931.3 zingepelekwa shuleni kuhudumia wanafunzi hewa katika mwaka wa fedha 2016/2017.

Alisema kati ya fedha hizo Sh milioni 527.8 ni kwa shule za msingi na Sh milioni 403.4 ni kwa shule za sekondari.

Aliitaja mikoa inayoongoza kuwa na wanafunzi hewa ni Tabora (12,112), Ruvuma (7,743), Mwanza (7,349), Dar es Salaam (4,096), Kagera (4,763), Rukwa (4,054), Singida (3,239), Kilimanjaro (2,594), Kigoma (2,323), Njombe (2,307), Simiyu (2,081) na Arusha (1,923).

Mikoa mingine ni Mara (1,855), Tanga (1,378), Geita (1,281), Morogoro (1,172), Mtwara (882), Mbeya (786), Shinyanga (695), Songwe (512), Manyara (330), Dodoma (284), Lindi (281), Pwani (187), Iringa (161) na Katavi (0).

Waziri huyo alisema wanafunzi hewa walianza wakati serikali ilipoanza kupeleka fedha shuleni kama ruzuku.

Alisema Sh bilioni 27 zimekuwa zikipelekwa kila mwezi kama ruzuku ya uendeshaji shule za msingi na sekondari na posho ya madaraka kwa ajili ya wakuu wa shule na walimu wakuu, lakini baadhi ya walimu waliamua kuongeza idadi ya wanafunzi ili wapate fedha zaidi.

“Huu ujinga unaweza kufanywa hata katika ngazi ya wizara ni jambo la uchunguzi, zile fedha hazipiti Tamisemi zinakwenda moja kwa moja shuleni,” alieleza na kuongeza kuwa hatua za kinidhamu zinaendelea kuchukuliwa kwa wale wote waliosababisha uwepo wa wanafunzi hewa na Tamisemi inaendelea kuhakiki takwimu zilizowasilishwa.

“Serikali haitegemei tena kuwepo suala la wanafunzi hewa. Naagiza makatibu tawala wa mikoa, wakurugenzi wa mamlaka za serikali za mitaa na wakuu wa shule kuhakikisha suala la wanafunzi hewa halijitokezi tena katika shule zote za msingi na sekondari,” alibainisha Simbachawene.