UN KUSOMESHA

Umoja wa Mataifa (UN), umejipanga kushirikiana na wadau wake kuwaelimisha vijana 50,000 hapa nchini ifikapo mwaka 2017.
Akizungumza kwenye maadhimisho ya miaka 71 ya UN Mratibu Mkazi wa umoja huo Alvaro Rodriguez alisema hatua hiyo ni endelevu kwani tayari vijana 10,000 wamewezeshwa kutambua malengo hayo hivyo itasaidia kuleta mabadiliko ya kiuchumi nchini.
"Tanzania ina changamoto kadhaa ikiwamo ya ongezeko la vijana na mahitaji yao tunahitaji kuhakikisha kwamba vijana nchini wanawajibika, katika kuejiendeleza na kuendeleza taifa ili kupata maendeleo chanya katika maisha yao.
Mgeni rasmi katika maadhimisho hayo, Waziri na Mambo ya Nje na Ushirikiano wa Afrika Mashariki, Balozi Agustino Mahiga alisema UN imekuwa ikishirikia vyema na Tanzania kwa mambo mengi ya maendeleo, ulinzi na Usalama. 

Alisema UN imekuwa ikiitumia wanajeshi wa nchi nyingi ikiwamo Tanzania katika kulinda amani kwenye nchi zilizopo kwenye migogoro, hatua ambayo imekuwa ikisaidia vijana kupata ajira na ujuzi wa masuala ya kiusalama.

MTOTO AMBAE HAJAWAHI KUTEMBEA WALA KUKAA.

 

Mtoto Devotha Lucanus Nagaikaya, anayeishi na shangazi yake katika mtaa wa Togo, kata ya Mahenge Mjini, wilaya ya Ulanga mkoani Morogoro ana umri wa miaka minne, lakini muda wote hubaki amelala kitandani.

Mtoto huyu hawezi kukaa, akacheza wala kutembea na shingo yake imelegea, mikono imekakamaa hivyo inawalazimu walezi wake kumlisha siku zote.

Wakati wote mtoto huyo analazimika kuwa na mwangalizi kwani anapojisaidia huhitaji kubadilishiwa nguo na kufuliwa.

Mtoto huyu analelewa na shangazi yake, Emma Nagaikaya baada ya mama wa mtoto huyu, Imelda Maumba, kumkimbia alipojifungua kutokana na kupatwa na ugonjwa wa kichaa.

Shangazi wa mtoto huyu anasema kutokana na ukosefu wa fedha na maisha duni ya familia yake, ameshindwa kumtibu mtoto huyo licha ya ushauri uliotolewa na madaktari wa kumfanyia mazoezi ya muda mrefu.

Imani ni kwamba pale mtoto huyo atakapofanyiwa mazoezi anaweza kujimudu baadhi ya mambo yeye mwenyewe.

“Mimi shangazi yake sina uwezo wa kifedha, nimeshindwa kumhudumia, muda wote ni kulala kitandani, kulishwa. Muda wote na kuwa chini ya uangalizi," anasema Nagaikaya.

Kutokana na hali duni ya kipato, ameshindwa kumpeleka mtoto huyo katika Hospitali ya CCBRT ya jijini Dar es Salaam alikoandikiwa kupatiwa mazoezi maalumu ya viungo tangu mwaka 2013 hadi sasa.

Kitendo cha kukosa fedha anasema kimemfanya kubaki mjini Mahenge bila ya kuwa na msaada wowote kwa kuwa Hospitali ya wilaya ya Ulanga haina wataalamu wala vifaa vya mazoezi maalumu ya viungo kwa mtoto huyo.

“Nimelazimika kubaki nyumbani nikihangaika na mtoto huyu na matatizo yake yanazidi kukua siku hadi kutokana na kukosa msaada wa kitabibu,” anasema Nagaikaya.

Nagaikaya anaeleza chanzo cha maradhi hayo akisema, mtoto aliyapata tangu akiwa na umri miezi mitano baada ya kuugua homa kali ambayo madaktari walipomchunguza waligundua aliugua homa ya uti wa mgongo.

“Tulimhangaikia kupata matibabu, lakini alipofikisha umri wa miezi minane alionesha dalili za kushindwa kukaa chini, kuongea, wala kushika kitu yenye mweyewe huku akilala muda wote kitandani,” anasema Nagaikaya.

Kutokana na uduni wa kipato, anasema inamlazimu kutumia takribani Sh 17,000 kwa ajili ya kununulia nepi maalumu zinazotosheleza kwa wiki moja pekee na fedha inapokosekana hana namna ya kufanya.

Nagaikaya, ambaye ni mama anayehudumia familia ya watoto 10 wakiwemo wanne wa mdogo wake, hana msaidizi mwingine isipokuwa kubeba majukumu hayo pekee.

Mama huyu anaishi katika nyumba ndogo na watoto hao wanaomtegemea kwa kila jambo. Anaomba jamii iweze kusaidia katika kumtibu mtoto huyo.

Wanafamilia hiyo, wanakiri mtoto huyo anayeumwa kuwa anapata mateso makubwa kutokana na maradhi hayo. Upendo Nagaikaya, anasema familia yao haina uwezo kifedha kugharimia matibabu na mazoezi ya mara kwa mara.

Anasema, baba wa mtoto huyo, Lucanus Nagaikaya mwenye watoto wanne hana uwezo na ameondoka nyumbani hapo muda mrefu kwenda kuishi katika Kijiji cha Ibuyu kutafuta maisha na kumwachia dadake amlee Devota.

Mama yake Devota, ambaye alipatwa na kichaa baada ya kujifungua mtoto huyo, yuko katika kijiji cha Kisewe ambako wanasikia bado yuko katika hali ya kuchanganyikiwa. Upendo, anasema jamii inayowazunguka imekuwa na mtizamo tofauti wakidai mtoto huyo apelekwe kupatiwa tiba za waganga wa jadi kwa madai kwamba amerogwa; kitendo kinachopingwa na familia yao.

Anasema baadhi ya majirani wengine wanaonesha kuguswa na ugonjwa wa mtoto huku wakimfariji shangazi yake.

Jamii inaombwa kumsaidia mtoto huyo kupitia simu ya mlezi wake, Emma Nakaikaya; 0712 801864 aweze kupata fedha za matibabu na pia kumhudumia.

Kwa mujibu wa wataalamu, ugonjwa unaomsumbua mtoto huyu ni matatizo kwenye ubongo (Cerebral Palsy). Huu ni ugonjwa ambao mtoto anaambukizwa akiwa ama tumboni au mara baada ya kuzaliwa kutokana na maambukizi ya bakteria wa ugonjwa huu.

Mtoto mwenye ugonjwa huu, anaweza kutambuliwa kabla ya kufikia umri wa miezi minne. Shingo yake hushindwa kusimama na hawezi kutembea anapofikia miezi 10 hadi mwaka mmoja.

Mganga Mkuu wa Mkoa wa Morogoro, Dk Frank Jacob, anaelezea ugonjwa huu akisema watoto wenye nao, hutambulika kutokana na dalili za kushindwa kukua kulingana na umri na uwezo wa vitu anavyovifanya, kuchelewa kuongea au kushindwa kabisa kuongea.

Dk Jacob anasema dalili nyingine ni mtoto mwenye ugonjwa huu anapokuwa akishikwa, mikono yake na mwili wake unakuwa umekakamaa mithiri ya kuni.

Watoto wenye kuzaliwa kabla ya umri wao na wanaozaliwa pacha wapo katika athari za kupatwa na ugonjwa huu.

Wengine walio katika uwezekano wa kuupata, ni wale wanaopata homa kali, uti wa mgogo na kurithi katika familia. Dk Jacob anasema ugonjwa huu hauna matibabu kamili isipokuwa, mtoto anaweza kufanyiwa mazoezi maalumu na ya muda mrefu ili aweze kuimarika kimaumbile kumwezesha kuongea ama kutembea.

Ni kweli tatizo la ugonjwa huu wa ulemavu wa ubongo linawapata baadhi ya watoto mara nyingi akiwa tumboni mwa mwama mjamzito, mtoto anaabukizwa wakati wa msukukuko wa kujifungua ama baada ya muda mfupi kupita,” anasema Dk Jacob.

Dk Jacob anasema pamoja na ugonjwa huu kutokuwa matibabu yakuponyesha kabisa, lakini moja ya tiba inayoweza kuwasaidia watoto wenye ugonjwa huu ni kuwafanyia mazoezi maalumu ya viungo na ni kwa muda wa miaka miwili hadi mitatu.

Anasema kupitia wataalamu maalumu wa mazoezi ya viungo, wanaweza kuboresha upungufu yaliyomo kwa watoto wenye ugonjwa huo na hivyo kuwasaidia kupata unafuu wa kuongea ama kutembea na si kuliondoa kabisa tatizo hili.

“Mazoezi haya yanahitaji vitu vingi na fedha nyingi kwani yanachukua muda wa miaka miwili hadi mitatu kumwezesha mtoto aliyeathirika na ugonjwa huu kuboreka kiafya,” anasema.

Hivyo anasema, ndugu ama wazazi na walezi wa watoto wenye matatizo haya wengi kipato chao ni kidogo na wanaishi mbali na hospitali ya rufaa kuliko na wataalamu na vifaa vya mazoezi maalumu kwa watoto hao.

Matokeo yake, hushindwa kuwapeleka watoto wao kufanyiwa mazoezi hayo maalumu ya viungo ambayo ni ya muda mrefu.

“Mazoezi haya yanaweza kufanyika hata nyumbani kwa mgonjwa, tatizo ni vifaa na wataalamu wa aina hii, hivyo wazazi na walezi wenye watoto wenye ulemavu wa ubongo wamekata tamaa kuwahudumia kitabibu,” anasema Dk Jacob.

Pamoja na hayo, anasema lengo la serikali ni kusogeza huduma kama hivyo katika hospitali za wilaya za mkoa huu, lakini bado changamoto ni rasilimali fedha na wataalamu.

JUSTIN BIEBER AONDOKA JUKWAANI BAADA YA MASHABIKI KUPIGA KELELE WAKATI ANATUMBUIZA.

Justin Bieber aliondoka katika jukwaa la tamasha yake mjini Manchester baada ya kuwataka mashabiki kutopiga kelele wakati anapoimba.

Wakati wa tamasha zake tatu zilizopita katika mji huo ikiwa miongoni mwa ziara yake ya dunia nzima mwanamuziki huyo alisema : Nathamini msaada ninaopata, nathamini mapenzi mnayonipa na nathamini ukarimu wenu.Lakini kelele munazopiga wakati ninapoimba lazima zisitishwe.Tafadhali na ahsanteni.Sidhani ni muhimu ninapojaribu kusema kitu na nyinyi mnapiga kelele.

Na mashabiki hao walipokataa kusitisha kelele zao aliangusha kipaza sauti na kuondoka katika jukwaa,huku baadhi ya mashabiki wakimzomea.

Baadaye kijana huyo wa miaka 22 alirudi kuendelea na tamasha yake na kuelezea kwa nini aliondoka kwa hasira.

''Nahisi kwamba nataka wasiliana nanyi.Lengo hapa ninapowaangalia katika macho ,mnajua kwamba tuko katika wakati muhimu na kwamba tunawasiliana''.

MWANAMKE MNENE KULIKO WOTE DUNIANI.

Kwa mujibu wa jarida la Daily Mail, inaelezwa kuwa mwanamke huyo aitwaye Iman Ahmad Abdulati mwenye miaka 36 hajawahi kutoka ndani kwa miaka 25 na amekua akiongezeka uzito wake kwa haraka mpaka kufikia kilo 500 zinazompa shida ya kujifanyia usafi na hata kula. Ripoti ya madaktari inaonesha kuwa mwanamke huyu anasumbuliwa na maambukizi ya bakteria wanaoshambulia ukuaji wa mwili.

Akiwa na miaka 11 alianza kusumbuliwa na tatizo hilo ingawa wazazi wake wanakiri kuwa hawakudhani kuwa ni tatizo lakini siku zilivyozidi kwenda ndipo wakabaini kuwa halikua jambo la kawaida hivyo wakaamua kutafuta wataalamu ambao walitoa ripoti kuwa ana matatizo ya mwili wake kukaa na maji mengi bila kuyatoa nje kitu ambacho sio cha kawaida kwa binadamu.

VIJANA MAARUFU WENYE USHAWISHI ZAIDI 2016.

Malala Yousafzai, Jaden Smith, Kylie Jenner, mabinti wa Obama na Chloe Grace Moretz wote kwa mara nyengine wamejumuishwa katika orodha ya vijana walio na ushawishi zaidi mwaka huu katika jarida la Times magazine.

Inatazama athari walio nayo vijana katika vyombo vya habari na katika mitandao.

Orodha hiyo inajumuisha pia waigizaji kutoka vipindi kama Stranger Things, Game of Thrones na Hunger Games.

Ni nyota kutoka sanaa ya musiki, mchezo uanamitindo, sayansi , biashra na siasa.

Malala Yousafzai alipigwa risasi na Taliban mnamo 2012.

Tangu hapo amekuwa kijana mwenye umri mdogo zaidi kuwahi kushinda tuzo ya Nobel ya amani na kupata kimondo kutajwa kwa jina lake, na kuna taaifa kwamba huenda kukatengenezwa filamu kuhadithia maisha yake.

Akiwa na umri wa miaka 19, Malal amejumuishwa katika orodha hiyo ya vijana wenye ushawishi tangu mwaka 2013 na bado anatetea haki za wasichana kusoma kote duniani.

Mamayao anapendwa kote duniani na baba yao ni rais wa kwanza mweusi Marekani.

Kwahivyo hakuna shinikizo kubwa kwa Sasha na Malia Obama?

Ni vizuri kuona kuwa wanafuata nyayo za wazazi wao, huku Sasha akishirikiana na mamake kuhimiza wanawake wanaelimika Liberia na Mali naye Malia akitarajiwa hivi karibuni kujiunga na chuo kikuu cha Harvard.

Awali wakitazamwa kwa sifa ya watu wawili na dadake Kendall, Kylie Jennermwaka huu amepata sifa peke yake.

Wakati Kendall na Kylie wote wakitokea mara tatu katika orodha hiyo ya vijana walio na ushawishi tangu 2013 - mara moja kila mtu kivyake na mara mbili wakiwa pamoja maarufu "iconic duo," Kendall hakujumuishwa mwaka huu kwasababu ametimiza miaka 20!

Kylie anepeperusha sifa ya jina la familia Jenner kwa kuorodheshwa kwa mara ya nne sasa.

Luka Sabbat na Jaden Smith wanawakilisha wanamitindo wanaume wanaosifika.

Katika mtandao wake wa Instagram anajiita mwanamitindo, mjasiriamali bingwa wa mitindo, na ukampata Tom Ford kukutumia suti , hapana shaka kuhusu sifa anazojipa.

Na Jaden hakuachwa nyuma katika suala la kuwana mtindo wake wa mavazi katika siku za nyuma ikiwemo kuonyesha mitindo ya mavazi ya wanawake ya Louis Vuitton.

Huenda unadhani humjui Maddie Ziegler, lakini ukiiona sura yake utamtambua.

Anasifika kama mchezaji densi katika kanda ya musiki y ya muimbaji maarufu Sia 'Chandelier na The Greatest', na huambatana na mwanamuziki huyo asiyejulikana sura katika tamasha kuonyesha mfano wake.

Maddie alijumuishwa pia katika orodha ya mwaka 2015 na akiwana miaka 14 tu ndiye kijana zaidi kutambuliwa mwaka huu.

Na orodha haiwezi kukamilika mwaka huu pasi kuwataja wanamichezo nyota.

Simone Biles na Laurie Hernandez katika mchezo wa gymnastics wamejumuishwa pamoja na waogeleaji Katie Ledecky na mkimbiza wa Syria Yusra Mardini waliong'ara katika mashindnao ya mwaka huu ya Olimpiki.

SHINDANO LA MR & MRS ALBINO LILILOFANYIKA KENYA. TAZAMA ILIVYOKUWA.

Mamia walijitokeza kushuhudia maonyesho ya urembo ya Mr na Ms Albino nchini Kenya. kila siku Albino wanakabiliwa na hatari ya kuwawa na viungo vyao vya mwili kuuzwa kutokana na imani za kishirikiana Afrika mashariki na Afrika kusini.

Akina dada walioshiriki katika mashindano ya urembo kwa watu wanaoishi na ulemavu wa ngozi ama Albinos jijini Nairobi, Kenya. Tarehe 21 Oktoba 2016.

Malkia mpya! Louise Lihanda, aliyeshinda taji la urembo kwa akina dada atembea jukwani akiwa amevalia vazi la kupendeza lililotengenezwa kwa kutumia puto. Loiuse ambaye ni mwanafunzi, amekuwa mwanamke wa kwanza kushinda taji hilo, katika mashindano yaliyofanyika jijini Nairobi, Kenya tarehe 21 Oktoba 2016.

Wanaume walioshiriki katika mashindano hayo wasimama tisti jukwaani. walishiriki katika mashindano ya urembo kwa watu wanaoishi na ulemavu wa ngozi ama Albinos jijini Nairobi, Kenya. Tarehe 21 Oktoba 2016.

Mfalme! Jairus Ongetta, ambaye amekabidhiwa taji ya uanamitindo bora kwa wanaume akiwa jukwaani na mavazi ya kupendeza.

Majaji walikuwa macho! Waliongozwa na mwanamitindo wa kimataifa Deliah Ipupa (katikati) tarehe 21Oktoba 2016.

WASANII WA BONGO WAAMBULIA PATUPU KWENYE TUZO ZA MTV MAMA.

Wawakilishi wa Tanzania katika tuzo za wanamuziki bora zinazoandaliwa na MTV Africa Music Awards 2016 (MAMA hawakufanikiwa kutwaa tuzo yoyote japokuwa waliweza kushiriki katika vipengele tofauti.

Tuzo hizo zilizotolewa Johannesburg, Afrika Kusini kuamkia jumapili, dalili zilionekana mapema kuwa mbaya kwani Vanessa Mdee aliyekuwa anawania tuzo ya msanii bora wa kike alishindwa baada ya Yemi Alade (Nigeria) kutangazwa mshindi.

Diamond Platinumz aliyekuwa anashindania tuzo ya msanii bora wa mwaka akipambana vikali na Black Coffee, Sauti Sol, Wizkid na Yemi Alade alishuhudia tuzo hiyo akikabidhiwa Wizkid.

Wimbo "Unconditionally Bae" ulioimbwa na Sauti Sol akishirikiana na Alikiba, ambao ulikuwa kwenye kipengele cha wimbo bora wa kushirikishwa haukupata tuzo.

Wimbo huo pia uliambulia patupu katika kipengele cha wimbo bora wa mwaka.

Hata hivyo, Yamoto Band iliyoshiriki katika tuzo hizo katika kipengele cha 'Chaguo la Wasilikizaji' haikufanikiwa kutwaa tuzo hiyo.

Vilevile msanii mwingine kutoka Tanzania aliyeshiriki tuzo hizo maarufu barani Afrika na kushindwa kufurukuta katika medani hiyo ya kimataifa ni Raymond.

CHELSEA 4-0 MAN U

Jose Mourinho alifedheheshwa aliporudi katika uwanja wa Stamford Bridge baada ya timu yake ya zamani kuicharaza Manchester United.

The Blues ,ambao walimfuta kazi Jose Mourinho kwa mara ya pili mwaka uliopita waliongoza kunako sekunde ya 30 ya mchezo kuanza baada ya Pedro kupata mwanya katika safu ya ulinzi ya Man United.

Gary Cahill alifunga bao la pili katika kipindi cha pili baada ya United kuruhusu kona iliopigwa na Eden Hazard kudunda katika eneo la hatari la man United.

United hawakuonyesha ishara yoyote ya kukomboa mabao hayo ,na hivyobasi wakaongezwa bao la tatu na Eden hazard baada ya mchezaji huyo kupiga mkwaju wa umbalii wa maguu 15.

N'golo Kante aliimwaga safu ya ulinzi ya United na kufunga bao la nne na la mwisho na kuipatia ushindi Chelsea huku ikipanda hadi nafasi ya nne.

United watasalia katika nafasi ya 7 huku pengo kati yao na viongozi wa ligi likiongezeka na kufikia pointi tano.

Wakati huohuo viongozi wa Ligi Manchester City walitoka sare na Southampton katika uwanja wa Etihard.

SIMBA YAONYESHA KUWA SIO TIMU YA MCHEZO MCHEZO.

Simba jana iliendelea kuwapa raha mashabiki wake baada ya kuifunga Toto Africans mabao 3-0 katika mechi ya Ligi Kuu Bara iliyochezwa kwenye Uwanja wa Uhuru Dar es Salaam.

Ushindi huo umeifanya timu hiyo izidi kujichimbia kileleni mwa msimamo wa ligi ikiwa na pointi 29 katika mechi 11 ilizocheza huku Toto ikibaki mkiani ikiwa na pointi zake nane katika mechi 12.

Mara kadhaa Toto huisumbua Simba zinapokutana, msimu uliopita zilitoka sare katika mechi ya kwanza na timu hiyo ya Mwanza kuibuka na ushindi katika mechi ya marudiano.

Muzammil Yassin ndiye aliyeanza kuamsha shangwe za mashabiki wa Simba baada ya kufunga bao la kuongoza katika dakika ya 43 kwa kuunganisha pasi nzuri ya Fredrick Blagnon.

Toto walicheza mchezo wa kuzuia karibu muda wote wa kipindi cha kwanza, hali iliyosababisha kwenda mapumziko wakiwa nyuma kwa bao hilo moja.

Dakika chache baada ya kuanza kipindi cha pili Blagnon alilazimika kutoka baada ya kuumizwa na beki wa Toto na hivyo nafasi yake kuchukuliwa na Laudit Mavugo.

Mavugo raia wa Burundi hakufanya kosa kwani katika dakika ya 52 aliiandikia Simba bao la pili. Alifunga bao hilo baada ya kupokea pasi safi ya Mohamed Ibrahim ‘Mo’na kuunganisha mpira moja kwa moja nyavuni na kumuacha kipa wa Toto Mussa Kirungi asijue la kufanya.

Muzammil aliwanua tena mashabiki wa Simba katika dakika ya 74 alipofunga bao la tatu kwa kuunganisha mpira wa kona uliochongwa na Said Ndemla na mpira kwenda moja kwa moja wavuni.

Katika mechi nyingine ya ligi iliyochezwa jana kwenye uwanja wa Sokoine Mbeya wenyeji Prisons walilazimishwa sare ya bao 1-1 na Mbao. Matokeo hayo yanaifanya Prisons kufikisha pointi 16 na Mbao pointi 13 katika msimamo wa ligi hiyo.

WANAOPEWA MIKOPO VYUONI KUBANWA.

Serikali iko katika mkakati wa kuwabana wanafunzi wanaopewa mikopo katika fani za kipaumbele, kutumikia katika utumishi wa umma nchini kwa muda fulani ili kuhakikisha dhamira ya serikali ya kuwapa kipaumbele inatimia.

Fani hizo ni sayansi za tiba na afya, ualimu wa sayansi na hisabati, uhandisi wa viwanda, kilimo, mifugo, mafuta, gesi asilia, sayansi asilia, mabadiliko ya tabianchi, sayansi za ardhi, usanifu majengo na miundombinu.

Hatua hiyo inatokana na serikali kubaini kuwapo wanafunzi wanaosomea fani hizo ili kupata mikopo, lakini baada ya kumaliza hukimbilia kufanya kazi nyingine au nje ya nchi, hivyo upungufu wa wataalamu waliowakusudia kubaki kama ilivyo.

Naibu Waziri wa Elimu, Sayansi, Teknolojia na Mafunzo ya Ufundi, Stella Manyanya aliyasema hayo hivi karibuni, alipozungumzia utoaji wa mikopo kwa wanafunzi wa elimu ya juu. Alieleza kuwa serikali inafikiria kuwe na utaratibu kwa wanaonufaika na mikopo ya kipaumbele kuingia makubaliano na serikali.

Manyanya alisema kuja na mtazamo na makubaliano hayo, yatakuwa kutumikia katika fani hiyo kwa kipindi fulani; na anapotoka aruhusiwe kwani sasa wapo wanapopangiwa huripoti na kuondoka bila kufanya kazi hizo.

Alisema suala hilo halitakuwa jipya kwani hapo nyuma walikuwa wakibanwa kuwa lazima kufanya kazi angalau kwa miaka mitano serikalini na baadaye ni ruhusa kwenda popote, lakini kwa sasa hawawezi kuwabana wote, lakini lazima kufanya hivyo kwa hao wa kipaumbele.

Alitoa onyo kwa wanafunzi wanaosomea masomo hayo ya kipaumbele, kama hawana wito wa kufanya kazi hizo kuacha.

Alitoa mfano wa walimu wa sayansi ambao serikali inatoa fedha ili kusaidia wanafunzi katika shule za wananchi hususan vijijini, ambako hakuna walimu wa sayansi, hesabu na mengineyo.

Aliwaasa wanafunzi hao kuwa kama nia yao ni kupata mikopo tu, pesa hizo siyo nzuri kwao kwa sasa.

Akizungumzia ulipaji mikopo hiyo, Manyanya alisema wanaboresha sheria ya kukusanya madeni kwa kushirikiana na waajiri.

Alisema serikali itakusanya madeni hata kwa wakopaji ambao wamejiajiri kwa sababu wengi wakimaliza masomo hawafikirii kulipa.

Alisema sasa lazima, wakopaji watambue fedha hizo ni mikopo na lazima kulipa. Alisema kwa wakopaji watakaoajiriwa, wizara inataka mikopo huo kuwa wa kwanza kukatwa kabla ya mingine ili kuepuka kuingiliana na sheria za kazi, zinazotaka mkopaji kuachiwa fedha fulani katika mshahara wake.

Akizungumza wakati wa kuweka jiwe la msingi la ujenzi wa hosteli katika Chuo Kikuu cha Dar es Salaam, Rais John Magufuli alisema hadi sasa serikali inadai Sh trilioni 2.6 ambazo zilikopeshwa kwa wanufaika mbalimbali wa elimu ya juu, lakini hadi sasa hawajarejesha na hiyo inaleta changamoto kwa waombaji wapya.

MFALME WA MOROCCO AMEWASILI NCHINI NA KITANDA NA MAZULIA YA KIFALME.

 Mfalme Mohammed VI wa Morocco amewasili nchini akiwa na msafara wa ndege tano zilizobeba vifaa vyake, ikiwamo kitanda na mazulia ya kifalme.

Mfalme Mohammed aliwasili jana saa 11:15 jioni akiwa na ujumbe wake wa watu zaidi ya 150, wakitokea nchini Rwanda.

Kabla ya kuwasili kwa ndege yake, zilitangulia ndege mbili ndogo za Morocco zilizokuwa na ujumbe ulioambatana naye.

Awali, Waziri wa Mambo ya Nje, Dk Augustine Mahiga alinukuliwa akisema msafara wa Mfalme huyo ulitanguliwa na ndege mbili zilizobeba vitu mbalimbali kwa ajili ya matumizi yake kwa kipindi chote atakachokuwapo nchini.

“Nadhani mnajua mapokezi ya kifalme yalivyo, wenzetu wanapenda kuandaa wenyewe kila kitu atakachotumia mfalme wao. Ndege mbili zimewasili zikiwa zimebeba vifaa mbalimbali vikiwamo kitanda na mazulia ya kifalme,” alisema Dk Mahiga kabla ya ujio wa Mfalme Mohammed VI.

Mfalme Mohamed VI alipokewa uwanja wa ndege na vikundi mbalimbali vya burudani na raia wa Morocco wanaoishi nchini. Ulinzi uliimarishwa katika Uwanja wa Ndege wa Kimataifa wa Julius Nyerere (JNIA) wa maofisa usalama wa pande zote mbili kwa kuzunguka pande zote za uwanja huo.

Mfalme huyo aliambatana na vyombo vya habari, ikiwamo televisheni maalumu ya familia ya kifalme na televisheni ya Taifa ya Morocco. Kamera za vyombo vya habari vya Morocco na Tanzania zilitawanywa sehemu mbalimbali za uwanja huo ili kupata matangazo ya tukio hilo moja kwa moja.

Baadhi ya wananchi kusimama kando ya barabarani kushuhudia msafara wa kiongozi huyo wa Morocco ulipokuwa ukipita kutokea uwanja wa ndege, walikuwa wakishangilia huku wakipunga mikono.

Kilichomleta  Mfalme Tanzania

Mfalme huyo anatarajiwa kufanya mazungumzo na Rais John Magufuli leo Ikulu jijini Dar es Salaam.

Mambo yatakayojadiliwa na viongozi hao ni uhusiano baina ya nchi zao na Morocco kutafuta uungwaji mkono ili irejee kwenye Umoja wa Afrika (AU).

Mfalme huyo atafanya ziara rasmi ya siku tatu na baadaye ataanza likizo yake na kutumia siku tano zaidi kutembelea vivutio vya utalii.

Serikali za Tanzania na Morocco zitatiliana saini makubaliano mbalimbali ya kibiashara ikiwa ni moja ya mkakati wa nchi hizo kuimarisha uchumi.

Waziri Mahiga alisema lengo la ziara hiyo ni kuanzisha diplomasia ya kiuchumi kwa kuwa Morocco ni moja ya nchi za Afrika zenye maendeleo.

Alisema uhusiano wa Tanzania na Morocco ulianza siku nyingi kupitia ubalozi wa Tanzania uliopo Ufaransa na Ubalozi wa Morocco nchini Kenya. Alisema Serikali ya Morocco imeonyesha nia ya kuanzisha ubalozi wake nchini.

Akizungumzia zaidi kuhusu ujio wa Mfalme huyo, Dk Mahiga alisema Tanzania na Morocco zitatiliana saini mikataba zaidi ya 16 ambayo baadhi yake itakuwa kati ya Serikali Kuu, taasisi na mashirika.

“Hii ni ziara ya kipekee kwa sababu ndiyo mara ya kwanza kwa Mfalme kutembea hapa nchini. Mfalme Mohammed VI ataambatana na wajumbe zaidi ya 150 ambao wengi wao wanatoka familia ya kifalme,” alisema Dk Mahiga.

Waziri huyo alisema ajenda nyingine ya ziara hiyo ni Morocco kuomba kuungwa mkono na Tanzania juu ya azima yake ya kutaka kurejea AU tangu ilipojitoa miaka 32 iliyopita.

Alisema Tanzania inaunga mkono dhamira ya Morocco kurejea AU kwa sababu ni moja ya nchi za Afrika na inahitaji kushirikiana kupitia umoja huo.

Alisema sababu ya Morocco kujitoa kwenye umoja huo ilikuwa ni mgogoro kati ya nchi hiyo na Sahara Magharibi.

“Wao wameona ni fursa kurejea katika Umoja wa Afrika, na sisi hatuoni tatizo katika hilo kwa sababu tunahitaji kushirikiana. Licha ya kutokuwa katika Umoja wa Afrika, Morocco imekuwa ikishiriki shughuli mbalimbali za kimataifa,” alisema.

Hata hivyo, Dk Mahiga alisisitiza kwamba msimamo wa Tanzania katika suala la Sahara Magharibi ni kuitaka Morocco kuiacha huru nchi hiyo kwa sababu zama za ukoloni zilishapita.