RAIS John Magufuli amesema kwamba binadamu wanapaswa kuwa wamoja hata kama wanatofauti mbalimbali zikiwemo za kimadhehebu ya kidini, siasa na kanda, huku akiwaomba viongozi wa dini kuendeleza juhudi zao za kuliombea taifa na kuwaunganisha wananchi licha ya tofauti walizonazo.
Dk Magufuli alitoa kauli hiyo jana baada ya kumalizika kwa misa takatifu ya kuadhimisha Jubilee ya miaka 50 ya ndoa ya Rais mstaafu wa awamu ya tatu Mhe.Benjamini Mkapa na Mkewe Anna iliyofanyika katika kanisa la Mtakatifu Petro lililopo Oysterbay jijini Dar es salaam.
Hafla ya jubilei hiyo ilifanyika nyakati za mchana kwenye ukumbi wa Kardinali Rugambwa uliopo kando ya kanisa la Mtakatifu Petro-Oysterbay na ilitanguliwa na misa ya shukrani.
Rais Magufuli alisema miaka 50 ya ndoa ya Mkapa ambaye ni muumini wa kanisa katoliki na mkewe Anna ambaye ni muumini wa kanisa la Kilutheri, inawafundisha watanzania wote hususani wanasiasa kuishi kwa upendo na kulinda amani waliyonayo.
Kwa upande wake, Rais mstaafu Mkapa pamoja na kuwashukuru viongozi wote, ndugu, jamaa na marafiki waliohudhuria misa ya shukrani na jubilei hiyo ya miaka 50 ya ndoa yake, alimshukuru mwenyezi Mungu kwa kuijalia ndoa yake umri mrefu.
Aidha alitoa mwito wa watanzania wote kupenda na kushirikiana huku akibainisha mafunzo aliyoyapata kutoka kwa viongozi wa kidini kuwa "kila mmoja ni zawadi kwa mwenzake".
No comments:
Post a Comment